Vendimi për rastin e Almir Aliut, reagon edhe BESA me kryetar Gashin
Duke bërë krahasime mes rasteve gjyqësore të deritashme në Maqedoni, nga Lëvizja BESA me kryetar Afrim Gashin shpalljen e aktgjykimit të rastit të Almir Aliut e shohin si dëshmi “se kur bëhet fjalë për drejtësinë që duhet ta realizojnë shqiptarët, praktikisht nuk ka ndryshuar asgjë”, transmeton Portalb.mk.
Nga BESA vlerësojnë se vendimi gjyqësor i sotëm tregon se gjaku i maqedonasve është më i vlefshëm se i gjaku i shqiptarëve dhe se diskriminimi ka marrë nuanca racizmi.
“Derisa për shqiptarët, si në rastet e montuara dhe të përvuajtura, tashmë të njohura për opinionin – edhe kur nuk ka bazë – shqiptohen dënime drakonike dhe burg i përjetshëm, në kohën që një vrasës shqiptari duhet ta marrë dënimin e vrasjes, kjo nuk ndodhë. Sikur shqiptarët në Maqedoni të mos jenë njerëz të njëjtë dhe sikur gjaku i një maqedonasi të jetë më i vlefshëm se gjaku i një shqiptari. Kjo, përveç diskriminimit, merr edhe nuanca racizmi. Ky vendim i sotëm e dëmton seriozisht mirëbesimin ndëretnik dhe besimin ndaj institucioneve në Maqedoni, për të cilin jemi angazhuar edhe ne tashmë një kohë të gjatë”, thuhet në reagimin e BESA-s.
BESA thotë se nuk duhet harruar se ata që e votuan prokurorin publik, Lubomir Joveski nuk janë fantazma, por janë deputetë që lejojnë të diskriminojnë shqiptarët edhe më tej.
