Ministrja e Jashtme e Bullgarisë, Zaharieva: Jemi vetë fajtor për situatën në Ballkan
Ministrja e Jashtme e Bullgarisë, Ekaterina Zaharieva, deklaroi se në Ballkanin Perëndimor ekzistojnë faktor të huaj, të cilët po kanë ndikim të fuqishëm në disa shtete. Ajo për këtë përgjegjës e bëri Bashkimin Evropian, pasi që sipas saj unioni nuk është angazhuar aq sa duhet në rajon, shkruan rtv21.tv
“Ekziston ndikimi i huaj. Ky është faji ynë. Nuk jemi aq sa duhet të angazhuar në Ballkanin Perëndimor. Nëse ne nuk jemi aty, atëherë është i pranishëm dikush tjetër, që nuk është pjesë e familjes evropiane, e as pjesë e NATO-s”, tha Zaharieva gjatë paraqitjes para Komitetit të Parlamentit të Evropës për politikë të jashtme, raportuan agjencitë.
Duke shpalosur prioritetet e presidencës bullgare të Bashkimit Evropian, Zaharieva konfirmoi se Ballkani Perëndimor mbetet prioriteti kryesor dhe e cilësoi rajonin si tejet të rëndësishëm për tërë Evropën.
“Besoj fuqishëm se nuk ka stabilitet dhe siguri në Evropë, pa stabilitet dhe siguri në Ballkanin Perëndimor”, tha Zaharieva.
