Ambasadori amerikan në Beograd: Ushtria e Kosovës nuk është kërcënim për askënd
Ai ka deklaruar se kjo ushtri duhet të formohet në përputhje me Kushtetutën e Kosovës, dhe konsultimeve që duhet të bëhen me të gjithë partnerët.
“Ushtria e Kosovës nuk është kërcënim më i madh për stabilitetin sesa ushtria e Serbisë, Bosnjës, Maqedonisë, Malit të Zi apo Greqisë”, deklaroi Scott, transmeton lajmi.net
“Formimi i Forcave të Armatosura të Kosovës duhet të jetë në kuadër të Kushtetutës së Kosovës dhe konsultimeve me të gjithë popujt që jetojnë atje. Ne e mbështesim pavarësinë e Kosovës, dhe çdo vend ka të drejtë të zgjedhë partnerët strategjikë dhe të forcojnë sigurinë. Por ajo kërkon miratimin e të gjithë popujve që jetojnë atje”, ka thënë ambasadori amerikan në Beograd.
Scott ka folur edhe për dialogun ndërmjet Kosovës dhe Serbisë.
Ai ka theksuar se duhet të ketë bisedime të gjata dhe dialog të drejtpërdrejtë, e gjithë fokusi sipas tij duhet të jetë në dialogun që organizohet në Bruksel.
Scott është pajtuar me Vuçiqin i cili ditë më parë kishte thënë se në Serbi ka shumë mite për Kosovën.
