Fushata për zgjedhjet lokale në gjysmë
Partitë, koalicionet dhe kandidatët e pavarur edhe sot me tubime dhe takime me qytetarët në shumë qytete dhe vendbanime, i prezantojnë programet zgjedhore për zgjedhjet lokale më 15-të tetor të këtij viti.
Bashkimi Demokratik për Integrim sot mban aktivitete në bashkësitë lokale, ndërsa konferenca shtypi sot do të kenë shefi i Shtabit Qendror Zgjedhor i BDI-së Fatmir Besimi dhe kandidati për Kryetar të Komunës së Çairit, Visar Ganiu.
Lëvizja BESA sot organizon tubim me banorët në Bogovinë.
Koalicioni “Jetë në Maqedoni” i kryesuar nga LSDM-ja do të mbajë takim me qytetarët e Çuçer Sandevës dhe mitingje në Shuto Orizarë, Butel dhe në Gjorçe Petrov.
Koalicioni “Për Maqedoni më të mirë” i kryesuar nga VMRO-DPMNE-ja në takime me qytetarët në Mogillë dhe Novaci dhe mitingje në Resnjë dhe në Manastir.
Fushata për rrethin e parë zgjedhor, filloi më 25 shtator, ndërsa përfundon më 13 tetor në orën 24.
Zgjedhjet e gjashta lokale në Maqedoni janë caktuar për më 15 tetor, ndërsa do të zbatohen në 3.480 vendvotime në 80 komuna dhe në Qytetin e Shkupit. Të drejtë vote do të kenë 1.814.644 qytetarë të regjistruar në Listën zgjedhore.
Raundi i dytë i zgjedhjeve është caktuar dy javë më vonë, më 29 tetor. Fushata zgjedhore për raundin e dytë përfundon më 27 tetor në orën 24.
