Çfarë duhet të kemi parasysh kur blejmë një shtëpi
Një nga gjërat më të vështira në jetën tonë, ka të bëjë me vendimin e blerjes së një shtëpie dhe nëse vendimi që do marrim do jetë i duhuri apo jo.
Ky vendim nuk ka të bëjë vetëm me faktin se blerja e një shtëpie është një nga investimet më të mëdha të jetës sonë, por dhe me faktin nëse do t’u përshtatet nevojave tona personale të jetës aktuale, por dhe shtimit të familjes në të ardhmen.
Shpesh kur ballafaqohem me klientë të ndryshëm, pyetjet rreth pjesëtarëve aktualë të familjes dhe nevojave të secilit prej tyre janë pjesë e një pyetësori të padiskutueshëm, por njëkohësisht dhe pritshmëritë për të ardhmen janë pjesë integrale e saj. Filozofia ime për jetën është se ajo është një analogji me ecurinë dhe zhvillimin e një biznesi,prandaj “një plan biznesi” për zhvillimin e familjes është shumë i nevojshëm duke qenë se vendime si blerja e një shtëpie pas një farë kohe mund të rezultojnë të pastudiuar mirë në lidhje me zhvillimin e familjes. Parashikimet nuk mund të jenë kurrë 100% të sakta, por kur ekziston mundësia e parandalimit të problemeve, ne e ndiejmë për detyrë që t’jua bëjmë me dije.
Nëse jeni në një moment kyç si ai i vendimit të blerjes së një shtëpie, ne ju sugjerojmë të keni parasysh disa nga faktet e mëposhtme:
1. Këshillohuni me një arkitekt
Së pari, një nga alternativat më të mira përpara blerjes së një apartamenti është ballafaqimi i planimetrisë së shtëpisë me një arkitekt, në mënyrë të tillë që të diskutohen të gjitha mangësitë apo avantazhet e saj. Arkitekti ka aftësi analitike për të parë çdo gjë me ftohtësi dhe për t’ju vendosur përpara fakteve reale sipas botëkuptimit të tij. Kjo është një seancë këshillimi që përgjithësisht arkitektët në Shqipëri e ofrojnë falas ose kundrejt një pagese minimale.
2. Ndriçimi natyral
Sigurohuni që shtëpia të ketë ndriçim të mjaftueshëm natyral, qoftë në ambientet e ditës, por dhe ato të natës. Një pjesë esenciale për ndriçim, por dhe për efekt ajrosjeje janë tualetet, të cilat nga eksperienca jonë e derimëtanishme një pjesë e madhe kanë vetëm ajrosje përmes aspirimit artificial. Kjo një alternativë tërësisht jo e mirë duke pasur parasysh aromërat dhe avujt e ndryshëm të këtij ambienti.
3. Pozicionimi i kollonave
Shpesh, për efekt shfrytëzimi maksimal të hapësirave apo mungesës së vëmendjes, në apartamente të ndryshme, kollonat janë të pozicionuara në qendër të ambientit të ndenjies apo dhomës. Kini parasysh, arkitektët mund të jenë në gjendje të realizojnë një sërë maskimesh vizuale, por ata nuk bëjnë magji. Një element vertikal, sado i vogël, në mes të një hapësire bën fragmentizim dhe është e pamundur për shfrytëzimin e hapësirave siç duhet.
4. Ekzistenca e cepave
Shpesh për efekt të pamjes së jashtme në hapësirat e brendshme dalin cepa të shumtë të cilat kthehen në një gangrenë për personat që do mund të shfrytëzojnë këto hapësira. Mbani gjithnjë mend që, as mobilimi nuk arrin dot t’i shfrytëzojë apo t’i maskoj këto hapësira. Mos harroni që ju do jetoni aty dhe, nëse do e zgjidhni ambientin me problem të tillë, të paktën kërkoni ulje çmimi.
5. Dimensionet
Mos harroni që pjesa më e madhe e kohës në një banesë shpenzohet në ambientet e ditës dhe jo të natës. Kështu që mos merrni një apartament ku dhomat e gjumit të zënë më shumë sipërfaqe se pjesa e ndenjies dhe gatimit. Mos harroni dhe dëshirat tuaja personale! Nëse pëlqeni të kaloni kohë në kuzhinë, atëherë kujdesuni të keni hapësirën e nevojshme për pasionet tuaja të gatimit.
Në fund të fundit, blerja e një shtëpie është një gëzim shumë i madh, por sidomos kur nxitet nga ardhja e një foshnjeje në jetë. Shijojeni maksimalisht, pasi janë momente të paharrueshme dhe mbi të gjitha jo shumë të shpeshta në jetën tonë.
