Kosovë, PDK Thyen Heshtjen Zgjedhore
Blerand Stavileci në konferencën e sotme të PDK-së theu heshtjen zgjedhore.
Anëtari i kryesisë së PDK-së, Blerand Stavileci ka thyer heshtjen zgjedhore në konferencën e parë që kjo parti pati pak minuta më parë, raporton kallxo.com.
“Të gjitha indikacionet tregojnë për një fitore të jashtëzakonshme, masive të koalicionit PDK-AAK-NISMA”, tha Stavileci në konferencë.
Këtë deklaratë e cilësoi si shkelje ligjore, Adnan Merovci i KPM-së.
“Ligji për zgjedhjet [e përgjithshme] tekstualisht thotë: neni 52, asnjë person ose medium nuk publikon ose transmeton çfarëdo materiali që i takon aktivitetit të fushatës. Çka është material i këtij aktiviteti: tubime, thirrje për votim në aspektin partiak, shpalim programi, çdo gjë që mund të ketë konotacionin e tillë”, tha Merovci.
Më tutje Merovci tha se mediet nuk mund të dënohen për diçka që jepet live, pasi nuk e dinë se çfarë do të flitet aty.
“Kjo është shkelje, por media që është live si mund ta dijë çka po fol ai qe flet [i referohet Blerand Stavilecit]. [Media]nuk mund të sanksionohet për diçka që jepet live. Nëse kjo çështje ritransmetohet, ju bëni po ashtu shkelje ligjore”, tha Merovci për RTV21.
Sipas nenit 52 të Ligjit për Zgjedhjet e Përgjithshme “asnjë person ose medium nuk transmeton ose publikon çfarëdo materiali që i takon aktivitetit të fushatës gjatë periudhës që fillon njëzetekatër (24) orë para hapjes së vendvotimeve deri në mbylljen zyrtare të vendvotimeve”.
Ndryshe në këtë konferencë PDK nuk e mohoi faktin që anëtarët e partisë së tyre janë akredituar duke përdorur një OJQ.
