Shqipëria, ku janë të përfaqësuar të tria besimet: mysliman, katolik dhe ortodoks, e ruan harmoninë fetare si një aset solid të shoqërisë. Për këtë diskutuan në Berlin përfaqësues të komuniteteve fetare nga Shqipëria
Komunitetet fetare në Shqipëri: një model frymëzues i harmonisë fetare në kohët e ekstremizmit fetar”, ishte tema e një forumi zhvilluar në Berlin me nismën e Ambasadës së Shqipërisë në Gjermani dhe me mbështetjen e organizatës së ndihmës Nehemiah Gateway.
Ambasadori i Shqipërisë në Berlin, Artur Kuko, nënvizoi, se bashkëekzistenca paqësore e religjioneve duhet të pranohet si një vlerë e rëndësishme evropiane që Shqipëria mund ta ofrojë me krenari në BE. Për fëmijët tani është e natyrshme që të rriten duke dëgjuar nga dritaret e shtëpive si lutjen e myslimanëve nga xhamia, ashtu edhe jehonën e kambanave nga kisha, tha ai. Sot më shumë se kurrë harmonia fetare nuk mund të jetë vetëm një dëshirë, por ajo është domosdoshmëri. Bota ka nevojë sot për dialog e harmoni ndërfetare, pikërisht në kohën kur përmes teknologjive të reja po përhapen edhe keqinterpretimet e besimit dhe po nxitet ekstremizmi fetar. Kështu u shpreh Gazmend Aga, nënkryetar i komunitetit mysliman në Shqipëri në fjalën e tij.
Ai nënvizoi, se në dialog me drejtuesit e besimeve të tjera në Shqipëri synohet që të nxirren të pah vlerat e përbashkëta mes këtyre besimeve në frymën e traditës shekullore të mirëkuptimit mes feve, që kanë shërbyer gjithmonë në Shqipëri si faktor stabilizues dhe madje kanë kontribuar në ruajtjen e identit kombëtar përtej besimit.
Në të njëjtën frymë u shprehën edhe përfaqësuesit e komuniteteve të tjera fetare, peshkopi Andon (Merdani), metropoit i Elbasanit, Shpatit dhe Librazhdit. Dom Gjergj Meta, vikar i përgjithshëm i dioqezës së Tiranës e Durrësit dhe zëdhënës i konferencës së ishpekëve shqiptarë, duke thekuar të njëjtën vlerë të harmonisë fetare në Shqipërinë sekulariste, ai tërhoqi vëmendjen për domosdoshmërinë, që të punohet dhe të mbrohet kjo vlerë për ta ruajtur atë edhe në të ardhmen. Sfida e sotme në botën e kërcënuar prej ekstremizmit dhe terrorizmit ndërkombëtar kërkon që ngjarjet të analizohen në kontekstin e kohës, e aq më tepër rëndësi fiton në këtë kontekst shpirti i dialogut dhe harmonia fetare, siç ekziston tradicionalisht në Shqipëri. Në këtë aspekt u përqendrua në fjalën e tij, Edmon Brahimaj, Baba Mondi, kryegjyshi i komuniteti të bektashinjve në Shqipëri.
