Maqedoni, ja sa është çmimi mesatar i duhanit

Gjithsej 14.588 tonë duhan nga rekolta e sivjetme janë blerë deri sot, ndërsa çmimi mestar është 192,08 denarë për kilogramë, njoftoi Ministria e Bujqësisë, Pylltarisë dhe Ekonomisë së Ujërave (MBPEU), transmeton Mia.mk, përcjell Portalb.mk.

Nëntë kompani për një muaj e gjysmë ose nga fillimi i blerjes, 15 nëntori, kanë marrë 75 për qind nga sasitë e pritura. Pagesa është realizuar 93 për qind, kultivuesve të duhanit u janë transferuar 2,612 miliardë denarë.

“Subvencionet për duhanin arrijnë 60 denarë që do të thotë se për momentin prodhuesit mesatarisht fitojnë nga 252 denarë për kilogramë”, informon MBPEU.

Sipas vlerësimeve të para, në rekoltën nga viti 2016 priten të blihen rreth 20.000 tonë duhan. Marrëveshjen e nënshkruan 10 ndërmarrje, prej të cilave nëntë e përmbushën kushtin për blerje – përfshirë datën 15 dhjetor dorëzuan garanci bankare se kanë siguruar mjete për këtë qëllim.