Dy ditë deri në fund të fushatës zgjedhore
Dy ditë deri në fund të fushatës zgjedhore sot partitë dhe koalicionet që marrin pjesë në zgjedhjet e parakohshme parlamentare vazhdojnë me prezantim të programit të tyre zgjedhor para qytetarëve.
Lideri i BDI-së Ali Ahmeti do të jetë prezent në një tubim me banorët e Shipkovicës ku do të bashkëbisedojnë së afërmi për çështje të ndryshme, ndërsa ditën e fushatës do ta përfundojë me një tubim qendror në qytetin e Gostivarit.
Rilindje me Besë do të mbajë tubim në Çair.
Tubim qendror në Shkup do të mbajë Aleanca për shqiptarët.
Koalicioni “Për Maqedoni më të mirë” i kryesuar nga VMRO-DPMNE, do të mbajë mitingje në Butel, Gazi Babë dhe Shuto Orizare, ndërsa Koalicioni “Për jetë në Maqedoni” në mitingje në Radovish dhe në Strumicë.
Kryetari i LSDM-së Zoran Zaev do të ketë takime me përfaqësues të Odave ekonomike të Maqedonisë.
Karvani zgjedhor i Koalicionit për ndryshime dhe drejtësi, i kryesuar nga Lidhja demokratike do ta mbajë tubimin përfundimtar parazgjedhor në Shkup.
Koalicioni “VMRO për Maqedoninë” do të ketë takime me qytetarë në komunën Gjorçe Petrov.