Haradinaj në Berlin flet për zhvillimet politike në Kosovë
Kryetari i Aleancës për Ardhmërinë e Kosovës, Ramush Haradinaj, po qëndron për një vizitë zyrtare në Berlin.
Haradinaj është pritur në takime të ndara nga Hans Joachim Falenski, këshilltari për Politikë të Jashtme i Grupit Parlamentar CDU-CSU, Helge Tolksdorf, drejtor për zgjerimin e BE-së, Evropën Juglindore dhe Turqinë në Ministrinë Federale për Çështje Ekonomike të Gjermanisë, si dhe Christian Wiesenhutter, Zëvendës Shef Ekzekutiv i Odes për Ekonomi dhe Industri në Berlin, transmeton Koha.net.
I pari i AAK-së, sipas një komunikate nga kjo parti, në këto takime foli për zhvillimet aktuale politike në Kosovë, aspektet socio-ekonomike dhe zhvillimore, sundimin e ligjit, proceset integruese si dhe mundësit e thellimit të bashkëpunimit të mëtejmë ndërmjet Kosovës dhe Gjermanisë.
Haradinaj, nikoqirëve ua përcolli edhe mirënjohjet dhe falënderimet për mbështetjen e vazhdueshme që Gjermania i ka dhënë dhe po i jep Kosovës.
