Thaçi: Nuk mund të lëvizim drejt Evropës duke rrënuar xhamia e kisha

Presidenti i Kosovës, Hashim Thaçi edhe një here e ka ripërsëritur qëndrimin e tij në lidhje me kishën ortodokse brenda kampusit universitar të Universitetit të Prishtinës “Hasan Prishtina”, raporton “Zeri.info”.

Thaçi, gjatë takimit me Gjeneral Sir Michael David Jackson, ka thënë se, Kosova nuk mund të lëvizë drejt Evropës duke rrënuar xhamia e kisha.

Presidenti po ashtu ka thënë se ka qenë vetë ai i cili ka luftuar kundër regjimit të Millosheviqit, mirëpo, siç deklaroi ai, tani jemi në një kohë krejt tjetër, përcjell “Zeri.info”.

Thaçi ka thënë se këto çështje duhet të zgjidhen vetëm me dialog dhe përmes rrigëve e institucioneve legale.

I pari i vendit po ashtu ka thënë, se të gjithë i njohim kushtet dhe rrethanat në kohën kur Millosheviqi e ka ndërtuar kishin ortodokse, mirëpo, siç deklaroi Thaçi, tani kohërat kanë ndryshuar, raporton “Zeri.info”.

“Zeri.info”, ju sjell të plotë deklaratën e presidentit Thaçi:

Dëshiroj të theksoj atë çka unë e mendoj si president i vendit. Ne në asnjë rrethanë nuk duhet të lejojmë që të kopjojmë formën, metodat dhe stilin e Millosheviqit.

Në asnjë rrethanë ne nuk duhet të lejojmë që nëse Millosheviqi ka rrënuar mbi 400 xhami, ka dëmtuar objekte të ndryshme të kishave katolike anë e kënd Kosovës, të teqeve të ndryshme. Ne njohim kushtet, rrethanat e disfavorshme të Kosovës kur ka filluar ndërtimi i këtij objekti në kampusin universitar.

Unë kam protestuar dhe luftuar kundër regjimit të Millosheviqit dhe punës së tij apo veprimet e tij që i ka bërë në Kosovë.

Tash jemi në një rrethanë tjetër, jemi në Kosovën e lirë dhe të pavarur. Jemi në një situatë që duhet të komunikojmë me njëri-tjetrin, të bashkëbisedojmë me njëri-tjetrin dhe ky problem të zgjidhet përmes dialogut dhe përmes rrugëve institucionale dhe legale.

Ne nuk mund të dërgojmë dhe nuk guxojmë të dërgojmë mesazhe që njerëzit e Kosovës mund të lëvizin drejt Evropës duke rrënuar xhamia e kisha.

Prandaj duhet të reflektojnë të gjithë që përmes dialogut të rregullohet kjo çështje dhe përmes aspekteve legale dhe institucionale.