Shpend Ahmeti, për autobusët e rinj urbanë: Tenderi nën mbikëqyrjen e BERZH-it, fitoi më i liri që ka plotësuar kriteret

Pas publikimit të lajmit se kompania “Iveco Czech Republic, a.s.” është shpallur fituese nga Komuna e Prishtinës për furnizim me autobusë të rinj për “Trafikun Urban” – e cila nga katër ofertues, aq sa ka pasur për këtë tender, “Iveco” ka qenë e treta më çmimin më të shtrenjtë – ka ardhur edhe reagimi i kreut të Komunës së Prishtinës, Shpend Ahmeti.

Ahmeti në një prononcim për Indeksonline ka thënë se procedurat janë zhvilluar sipas rregullave të prokurimit të BERZH.

“Në çdo hap është dashur të merret aprovimi nga Londra. Kompania që nuk i ka përmbushur kushtet e tenderit është përjashtuar nga gara, sepse nuk kanë ofertuar autobusë të kërkuar me specifikacion të aprovuar nga BERZH”, ka thënë ai.

Sipas kryetarit Shpend Ahmeti, ka fituar çmimi më i lirë nga kompanitë që kane kaluar kriteret.