Lutfiu: Materiale shkollore falas për 5 mijë nxënës nga vendbanimet e vërshuara
Ministri i Arsimit dhe Shkencës, Pishtar Lutfiu, sot ka vizituar shkollën fillore “Gjergj Kastrioti Skënderbeu” në Komunën e Haraçinës.
Ai tha se për nevojat e kësaj shkolle janë siguruar banka dhe karike të cilat ishin dëmtuar gjatë vërshimeve që kapluan rrethinën e Shkupit. Gjithashtu, ai tha se ministria e arsimit do t’i dalë në ndihmë të gjithë nxënësve të vendbanimeve të vërshuara në Shkup dhe Tetovë, me ç’rast do sigurohen materiale shkollore falas për më shumë se 5 mijë nxënës.
“Sot në Haraçinë, në shkollën e mesme “Gjergj Kastrioti Skënderbeu”, kemi ardhur që ta vizitojmë shkollën e cila ka qenë një nga shkollat më të dëmtuara nga vërshimet të cilat kapluan rajonin e Shkupit dhe Tetovës. Një nga dëmet e konsideruara të objektit të shkollës ka qenë edhe podrumi në të cilin ka pasur një numër të konsiderueshëm të dëmeve materiale siç janë banka, karike, libra dhe kompjutera. Me këtë rast, ne si Qeveri, jemi angazhuar maksimalisht me institucionet shtetërore që tu dalim në ndihmë këtyre rajoneve. Ne si Ministri e Arsimit u kemi dhënë prioritet institucioneve arsimore, gjegjësisht shkollave që sa më parë të bëhet pastrimi, dezinfektimi dhe lyerja e shkollave. Deri tash, këto procedura janë kryer edhe sot në bashkëpunim me Komunën e Haraçinës, ku kemi siguruar 60 banka dhe karike me qëllim që mësimi të fillojë në kushte normale dhe nxënësit të mund të ulen në bankat e reja. Poashtu, javën që vjen, do të sigurohen edhe 60 banka të tjera. Prandaj, shfrytëzoj rastin që ti falenderohem edhe Sektorit joqeveritar dhe atij të biznesit që ndihmuan në këtë fatkeqësi natyrore. Poashtu, si ministri e arsimit dhe shkencës, kemi siguruar rreth 5000 çanta dhe materiale shkollore për nxënësit nga vendbanimet e vërshuara”, u shpreh ministri i arsimit Pishtar Lutfiu.
Ai tha se gjithcka është gati që viti shkollor 2016-2017 të fillon nesër, 01 shtator.
