Shkatërrohet banda e drogës në Spanjë, arrestohen 3 shqiptarë
Tre shqiptarë janë vënë në pranga në kuadër të një operacioni të përbashkët të policisë spanjolle dhe asaj shqiptare.
Grupi kriminal përbëhej nga bullgarë dhe shqiptarë dhe aktivitetin e kishte përqendruar në tregtinë e heroinës dhe kokainës.
Shqiptarët e arrestuar janë: A. Q., 47 vjeç; A.D., 41 vjeç dhe P.D., 45 vjeç. Gjatë kontrolleve të ushtruara, policia ka gjetur një laborator, në të cilin bëhej përpunimi i kokainës.
Në cilësinë e provës materiale janë sekuestruar edhe 38 kg heroinë, 8 kg kokainë, 50 kg përzierës, 1 pistoletë me silenciator dhe pajisje presimi, që shërbenin për paketimin e drogës.
Zyra e shtypit e Europolit informon se hetimi i Rojës Civile Spanjolle i nisur në dhjetor 2015 u mbyll më 10 gusht 2016 me arrestimin e 7 anëtarëve të kësaj organizate kriminale, transmeton Shekulli.
Një shtetas shqiptar mjaft i njohur për policinë spanjolle dyshohet se është drejtuesi i grupit kriminal.