Mustafa: Kufijtë e Kosovës janë caktuar kur është çliruar

Kryeministri Mustafa, tha se në kufirin me Malin e Zi ka ndërhyrë SHBA duke definuar marrëveshjen e Kumanovës me Planin e Ahtisarit.

“Kufiri me Malin e Zi është ai në të cilin ka ndërhyrë Aleanca Veriatlantike në krye me SHBA-të, i definuar në Marrëveshjen e Kumanovës, i “vizatuar” me Planin e Ahtisarit, i respektuar me Planin Hapësinor të Republikës së Kosovës dhe me Planin Zhvillimor të Komunës së Pejës”, shkruan kryeministri.

Sipas Mustafës kufijtë e Kosovës janë caktuar kur është çliruar Kosova dhe nuk caktohen sot, as në mbledhjen e 1 Shtatorit.

“Komisioni Shtetëror për shënjimin e vijës kufitare nuk ka përcaktuar kufij të rinj, ka respektuar kufijtë në të cilët kemi shpallur pavarësinë. Prandaj , garat me harta dhe me dokumentacion kadastral, ndërmjet Komisionit Shtetëror dhe disa ekspertëve që kanë marrë bajrakun për të treguar se cilët duhet të jenë kufijtë e Kosovës e humbin rëndësinë. Kufijtë për Kosovën janë caktuar kur është çliruar Kosova dhe kur është shpallur pavarësia. Nuk caktohen sot, as në mbledhjen e 1 Shtatorit”, shkruan tutje ai.

Mustafa poashtu shtoi se duhet të ndihemi të nderuar që po merret me çështjet tona SHBA pasi që siç tha ai, nuk i kanë borxh Kosovës por u kemi ne atyre.
“Ne duhet të ndihemi të nderuar dhe të respektuar që me çështjet tona merret edhe zëvendëspresidenti i Shteteve të Bashkuara të Amerikës. SHBA nuk i kanë borxh Kosovës, ne u kemi borxh Shteteve të Bashkuara të Amerikës dhe komunitetit ndërkombëtar për gjithë atë që e bënë për lirinë dhe pavarësinë e Kosovës përfshirë edhe viktimat njerëzore të tyre. Asnjëri nga deputetët dhe ne qeveritarët nuk është aq i ri sa mos të kujtojë kohën e luftës dhe apelin që të na ndihmojë bashkësia ndërkombëtare”, shkruan në fund Mustafa./21Media