Uefa e përfshin Ajetin në zbulimet e Euro 2016
Tjetër vlerësim nga Uefa për Arlind Ajetin. Pasi e shpalli lojtarin më të mirë të ndeshjes në takimin ndaj Rumanisë, qeveria e futbollit europian e ka përfshirë mbrojtësin shqiptar si ndër zbulimet e Euro 2016.
Ajeti, i cili spikati me fanellën e Kombëtares Kuqezi në Francë është përzgjedhur si një nga 8 futbollistët të cilët i kanë surprizuar të gjithë me paraqitjet e tyre të shkëlqyera në kampionatin europian. Falë formës së mirë që tregoi në turneun që u zhvillua në Francë, 22-vjecari shqiptar vetëm pak ditë më parë firmosi zyrtarisht një kontratë afatgjatë me Torinon që është një skuadër e mirë në Serinë A dhe ku Ajeti pritet të tregojë realisht sesa vlen, transmeton Supersport.
Arlind Ajeti është futbollisti më i ri në moshë nga 8 emrat që Uefa ka përzgjedhur si zbulimet e Euro 2016, pasi shumica e tyre janë lojtarë që i kalojnë të 28-tat dhe që Europiani u ka shërbyer vetëm për t’u rritur vlerën në merkato. Lidhur me Arlind Ajetin në faqen zyrtare të Uefas lexohet: Përpara startit të Euro 2016 ai u rrëzua me Frosinonen nga Seria A në Serinë B italiane, një kompeticion me shumë peripeci për mbrojtësin i cili u detyrua ta ndiqte nga stoli ndeshjen e parë të Shqipërisë në grupin A atë ndaj Zvicrës. Në takimin ndaj Francës edhe pse zhvilloi një paraqitje të shkëlqyer Ajeti vuajti një dëmtim në minutat e fundit, ndërsa ishte thjeshtë i mrekullueshëm në fitoren historike ndaj Rumanisë duke fituar edhe cmimin e lojtarit të ndeshjes, së fundmi është transferuar te Torino.
Me këto fjalë Uefa ka përshkruar europianin fantastik që zhvilloi Arlind Ajeti. 7 zbulimet e tjera të Euro 2016-të sipas Uefas janë: Raphael Guerriero i Portugalisë, Robson-Kanu i Uellsit, Nolito i Spanjës, McGovern i Irlandës së Veriut, Halldorson i Islandës, Pazdan i Polonisë dhe Meunier i Belgjikës.
