Lata përkrah Peticionin kundër devijimit të lumit Radikë
Shoqatat joqeveritare dhe klubet e shumta të Dibrës që organizojnë peticion kundër projektit “Fusha e Llukovës”, përkrahen edhe nga kryetari i komunës së Dibrës, Ruzhdi Lata.
Për këtë punë ka diskutuar Këshilli komunal që mbron interesat e popullit dibran por edhe unë si kryetar i këtij vendi , sepse kjo grabitje është e madhe për të gjithë, tha Lata.
“Më vjen shumë mirë në këtë rast që shoqatat joqeveritare , kanw marrë iniciativën e një peticioni që unë e vlerësoj sepse rezistenca zyrtare ka mbetur në vesh të shurdhër për marrjen e burimeve në fushën e Llukovës, në trekëndëshin Shqipëri-Kosovë- Maqedoni, ujëra që na japin shpirt dhe dobi, që është parametër katastrofal që Dibrës t’i merren 2 metra kub ujë në sekondë”, shtoi Lata.
Ai më tej potencoi se dëmi më i madh i Radikës bëhet në florën dhe faunën ku nëse merret uji i Radikës do të zhduken 3336 bimë, do të humbin tetë lloje të peshkut dhe 120 lloje zogj luginën e Radikës .
Ky krim dhe ky dëm i madh që i bëhet këtij rajoni , duhet të ndalohet, edhe pse sipas Latës banorët e Rekës heshtin që është në dëm të tyre. Lata apelon tek Qeveria e Maqedonisë të ketë mirëkuptim dhe kërkonë ndihmë nga Shqipëria të bëhet devijim i gjashtë burimeve, ujë i të cilëve derdhet në detin Adriatik dhe më saktë derdhet në detin Egje.
Ai gjithashtu apeloi tek ndërmarrja ELEM dhe Banka Botërore që nuk kemi kundër të prodhohet energji elektrike në Maqedoni, por jo me shpirtin, me frymëmarrjen e dibranëve, jo me ujin dhe gjakun e dibranëve sepse mjaft kemi vuajtur, pra le të jetë kjo natyrë e bukur ashtu siç janë dibranët, përfundoi Lata dhe nënshkroi peticionin kundër këtij projekti vdekjeprurës për Dibrën.