Shqiptarët shënojnë sot 105 vjetorin e Ditës së Alfabetit

Nën patronatin e Qeverisë do të organizohet një manifestim me akademi solemne në Manastir. Zëvendëskryeministri Musa Xhaferri pasdite do të vizitojë Muzeun e Kongresit të Alfabetit në Manastir, ndërsa në kuadër të kësaj vizite do të jetë e pranishme edhe ministrja e Kulturës e Shqipërisë, Mirela Kumbaro. 

Në Shkup, Instituti për Trashëgimi Kulturore të Shqiptarëve ka organizuar aktivitete me rastin e 22 Nëntorit – Ditës së Alfabetit. 

Ky përvjetor i Alfabetit e ka gjetur Shkupin gjithashtu në një atmosferë festive, në prag të 101 vjetorit të Flamurit dhe Pavarësisë së shtetit shqiptar. 

Me rastin e festës së alfabetit, mesazhe urimi kanë dërguar presidenti maqedonas, kryeministri dhe personalitete tjera të jetës politike e shoqërore. 

Në Manastir do të zhvillohet pasdite një takim midis zëvendëskryeministrit të Maqedonisë, Musa Xhaferri dhe ministres së Kulturës të Shqipërisë, Mirela Kumbaro.  Ndërsa në mbrëmje, në Pallatin e Kulturës në këtë qytet do të mbahet Akademi Solemne me rastin e kësaj dite, në organizim të Muzeut të Alfabetit mbështetur nga Ministria e Kulturës e Maqedonisë. 

22 Nëntori është festë shtetërore për shqiptarët në Maqedoni dhe ditë jo pune.
Edhe komuna e Strugës është përkujdesur për të shënuar me disa aktivitete 22 Nëntorin – Ditës së Alfabetit Shqip. 

Me rastin e 105 vjetorit të -të “Kongresit të Alfabetit” sonte mbahet mbrëmje festive në Pallatin e Kulturës, ku mes tjerash do të performojë edhe Orkestra e Qytetit të Tetovës dhe Sh.K.A ‘’Xheladin Zeqiri’’. 

Programi i hartuar dhe përgatitur nga komuna e Strugës, me rastin e festave të nëntorit,  ka parashikuar një program të ngjeshur me aktivitete kulturore artistike. Këto aktivitetet fillimisht do të zhvillohen nëpër shkollat fillore dhe të mesme, por, për herë të parë mbase Struga do të shndërrohet gjatë tërë javës në qendër kulturore në saje të ngjarjeve kulturore. 

Në Tetovë mbrëmë u mbajt një akademi solemne kushtuar 22 Nëntorit. Kryetarja e Tetovës, Teuta Arifi mori pjesë në manifestimin e organizuar nga shoqata e pedagogëve shqiptar në nder të 22 Nëntorit- Ditës së alfabetit shqip. 

“Pas Kuvendit të Lidhjes Shqiptare të Prizrenit, Kongresi i Manastirit ishte tubimi i dytë më i madh i shqiptarëve, ku krahas çështjes gjuhësore, nga ky kongres dolën edhe kërkesa politike e historike që trasuan rrugën në periudhën e fundit të Rilindjes Kombëtare Shqiptare që ajo të jetësohet me shpalljen e pavarësisë së dy shteteve shqiptare, avancimin e statusit të shqiptarëve në kufirin e tyre etnografik dhe hapjen e rrugës së perspektivës evropiane të kulturës shqiptare e cila është sfidë e kohës tonë dhe betejë e gjeneratës sonë”, deklaroi kryetarja e komunës së Tetovës, Teuta Arifi. 

Aktivitete për shënimin e Ditës së Alfabetit Shqiptar janë organizuar edhe nëpër komunat e tjera shqiptare, kryesisht aktivitete nëpër shkolla dhe institucione kulturore dhe arsimore. 

Komuna e Gostivarit dhe disa kompani të qytetit kanë mbështetur festivalin tradicional të këngës popullore “Zëri i Alfabetit”, që u mbajt me rastin e “105 vjetorit Kongresit të Manastirit”, në qytetin e Manastirit. Në komunën e Gostivarit gjithashtu është shënuar kjo festë kombëtare shqiptare. /Portalb