Anketë: Ja kush do të fitonte nëse sot do të mbaheshin zgjedhjet në Maqedoni!

Sipas anketës së fundit të Agjencisë “Faktor Plus Adria”, krahasuar me anketën paraprake të po të njëjtës agjenci, rejtingu i partive në pushtet ka rënë, gjegjësisht rejtingu i VMRO-DPMNE-së ka rënë për 1.0%, ndërkaq i BDI-së për 0.1%. Nga ana tjetër rejtingu i partive opozitare ka pësuar ngritje, respektivisht, rejtingu i LSDM-së është rritur për 1.1%, ndërkaq ai i PDSH-së është rritur për 0.1%, njofton Portalb.

Nëse sot do të mbaheshin zgjedhjet, VMRO DPMNE do t’i kishte marrë 28.9% të votave, LSDM 24.6%, BDI 10.0%, ndërkaq PDSH 4.4%. Kështu tregon anketa e fundit telefonike e Agjencisë “Faktor Plus Adria” nga Beogradi, e cila është realizuar në periudhën prej 15.02.2016 deri më 22.02.2016 dhe ka përfshirë 1.200 të anketuar.

Sipas anketës, 78% e të anketuarve kanë i janë përgjigjur pozitivisht, pyetjes se a do të dilni në votime, ndërkaq 22% kanë dhënë përgjigje negative.

Në lidhje me çështjen e plotësimit të kushteve të Marrëveshjes së Përzhinos, 17% e të anketuarve janë deklaruar se fare nuk janë plotësuar, 56% mendojnë që janë plotësuar pjesërisht, ndërkaq 27% e të anketuarve shprehen se kushtet e Marrëveshjes së Përzhinos janë plotësuar plotësisht.

61% e të anketuarve mendojnë se nuk ka hapësirë të barabartë në mediume, 29% janë shprehur se ka, ndërkaq 10% janë shprehur me fjalët “nuk e di”.

Shumica e të anketuarve janë përgjigjur se janë pro integrimit të Maqedonisë në BE, gjegjësisht 76%, 16% kanë dhënë përgjigje negative, ndërkaq 8% nuk kanë dhënë fare përgjigje. /Portalb

LEXO: Anketë: Ja kush do të fitonte nëse sot do të mbaheshin zgjedhjet në Maqedoni! (statistika)