Rreziku që vjen nga BESA

Qarkullonte diku nëpër internet një meme shumë interesante, që e zbulova para do ditësh, e cila sëbashku me situatën dhe ngjarjet e kohëve të fundit, mendoj që është shumë mirë të aktualizohet nëpërmjet një shkrimi, sepse fundja më shërbeu si inspirim. Është fotoskec i një pacienti që ka shkuar në vizitë tek psihiatri, diagnoza e të cilit është kjo:

“Ju vuani nga depresioni ngaqë as nuk pini, as nuk drogoheni dhe nga kjo arsye ju keni perspektivë shumë të qartë të botës.“

Fatkeqësisht shumica e intelektualëve që bëjnë amin secilën fjalë të liderëve banalë dhe të dobët që i kemi, janë në një stad tjetër klinik psihiatrik, atë të shizofrenisë. Si të tillë, nuk janë në gjendje të shohin realitetin sado që t’i hapin sytë. Shumë shpesh e kam kritikuar BDI-në dhe politikat e tyre me në krye Ali Ahmetin, pasivitetin e opinionit publik dhe klasës intelektuale kundrejt atyre politikave dhe vendimeve të gabuara, dhe besoj që kam patur të drejtë. Me të vërtetë nuk jam nën depresion, si ai miku më lartë, por ka shumë sende të cilat i kam parë në formë shumë lucide dhe kam shkruar për to këto vitet e fundit. Të tillë moment kisha edhe kur pashë atë fotoskec. Luciditeti im qëndronte në rrezikun eminent që na kanoset të gjithë shqiptarëve, që nuk jemi akoma në gjendje ta perceptojmë në mënyrë të drejtë megjithëse tek një pjesë e jona ekziston dyshimi. Dhe ky rrezik nuk vjen as nga politikat e gabuara të BDI-së as nga bëmat e PDSH-së.

Ajo që po na kanoset sot të nderuar, është një lëvizje kuazi patriotike që mban një emër që është simboli historik i shqiptarëve, e cila nuk ka një program të qartë ose të paktën akoma nuk kanë gjetur portparollin e duhur për ta shpalosur atë në publik dhe që në vete të përmbajë të paktën pak nga fryma që jehon emri i saj. Një grupacion që po flerton me të gjithë, në ndërkohë duke konspiruar kundër të gjithëve. Një grupacion që mund të na krijojë nostalgji për Aliun dhe Menduin. Sado e pamendueshme dhe e pakapshme të na duket kjo. Një kuazi parti që mesa shihet nga sondazhet do të jetë fuqia politike që do të përzihet mes BDI-së dhe PDSH-së. E kam fjalën për Besën.

Horizonti politik shqiptar për momentin mund të paraqitet në këtë formë: BDI-ja megjithëse shumë e fuqishme si në vota ashtu edhe në financa, nuk ka arritur të krijojë gjeneratën e re të politikanëve dhe ashtu si e kam shprehur edhe më përpara po mplaket si në kuadro ashtu edhe në politikat dhe idetë të cilat i mbështet dhe i propagon. Po e humb energjinë me të cilën në kohë të kaluara dominonte skenën poltike në vend dhe shihëj si një faktor i stilit king=maker dhe që shërbente si urë politike në normalizimin e marrëdhënieve ndëretnike në vend. PDSH-ja nga ana tjetër ka humbur gjithashtu shumë në kuadro por edhe në ide, sepse me retorikën e saj gjoja ultra nuk është aspak interesante për atë pjesë të elektoratit që kërkon dicka të re, dicka ndryshe nga ajo që i ofrohet sot. Ajo ka humbur elegancën e saj politike, dhe me këtë edhe sharmin. Ka mbetur të mbahet vetëm në bazën e saj të idhtarëve.

Në një situatë të këtillë është e domosdoshme hyrja e një force të re, një force të tretë që të lëkundë bazat e politikës aktuale dhe që të inkuadrojë në procesin elektoral  edhe atë pjesë të popullsisë që kërkon kycje por nuk e gjen dot në dy partitë më të mëdha shkaku i rigjiditetit të tyre. Këtu qëndron hapësira ku lëvizja BESA po mundohet të depërtojë, në atë hapësirën mes dy sferave, në ekuatorin e politikës shqiptare. Normalisht kjo gjë do të më gëzonte, por nuk besoj fare në atë që kjo lëvizje paraqet, nuk më bindin fjalët e portparollëve të tyre dhe nuk e shoh askund as edhe platformën e tyre politike. Askund nuk i shoh idetë e reja që duhet të vijnë nga një lëvizje e re partiake. I shoh shumë të zbehtë dhe të lëkundshëm në atë mbi të cilën ata qëndrojnë. E shoh si të rrezikshme për aspiratat real politike të shqiptarëve të Maqedonisë, që të ardhmën e tyre e gjejnë në botën perëndimore. Bazamenti i saj i dyshimtë proturk dhe erdoganist është një kancer që mund të rënojë të ardhmen e gjeneratave të reja shqiptare nëse asaj i lejohet ta bëjë këtë.