Maqedoni, sa të rinjtë tonë i ndjekin trendet e modës?

Moda nënkupton tërësinë e shijeve, zakoneve, dëshirave të përbashkëta të një rrethi shoqëror në një kohë të caktuar, që karakterizojnë mënyrën dhe stilin e jetës. Thënë thjesht, moda është sistem normash me të cilët preokupohet kryesisht të rinjtë – ata të cilët kujdesen më shumë për mënyrën e sjelljes, botëperceptimin, veshmbathjen, llojin e muzikës që dëgjojnë, filmat e preferuar, yjet që imitohen, lokalet që frekuentojnë, shijet dhe ndjeshmëritë estetike, shkruan Portalb.mk.

Portalb bisedoi me të rinjtë tetovarë rreth kuptimit të tyre për modën, rreth asaj se a është ajo diçka që i imponohet vetvetishëm jetës dhe botës bashkëkohore, pjesë e së cilës jemi dhe ne.

Abaz Emini mendon se moda te ne vinë si pasojë e ekspansionit të medieve digjitale, të cilat na bombardojnë me modele të ndryshme jetese, që janë larg mundësive që ofron hapësira ku jetojmë ne shqiptarët.

“Janë një grupi i vogël të rinjsh e të rejash që mund t’ia lejojnë vetvetes ndjekjen e modës në veshje e në stil jete, sepse populli ynë është i varfër. Po të ishte ndryshe nuk do të shkonim ne me strajcat në krahë të kërkonim punë në vendet e tyre, po do të vinin ata te ne. Mendoj se dëshira për të jetuar si bota e pasur perëndimore, ka shtuar dëshirën e të rinjëve që ta braktisin vendin e tyre”, thotë Emini, transmeton Portalb.mk.

I riu Armend Azizi është i mendimit se, hiq atë që është normale të ndiqet si modë (muzikës, veshjes…) dhe që është e mundshme të arrihet në një vend me paga mizerje dhe me papunësi kronike, tjetra është budallallëk dhe ëndërr e parealizueshme.

“Nuk i kuptoj disa shokë që vuajnë për shkak se nuk kanë mundësi ta posedojnë ajfonin e tipit më të ri, BMW-në më ekstravagante, pse nuk kanë mundësi të vizitojnë Dubain, të bëjnë pushime në Karaibe. Këto janë ëndrra të kota që nuk mund të realizohen në Tetovë e në Maqedoni, përfundon Armendi.

Lidhur me temën në fjalë, Portalb bisedoi edhe me Ismail Jusufin, i cili ka mendim interesant për modën. Ai mendon se nuk është patjetër që moda të lidhet me lukset e botës, sepse atë e sjell vetë koha në mënyrë të vetvetishme.

“Unë nuk kam para për t’u veshur si një yll filmi, ama gjej mundësi të vishem më ndryshe se babai a gjyshi im. Tregu është plot roba të lira e të mira që shiten me shenjat e firmave të mëdha. Shumë miq të mi i blejnë këto veshje dhe duken mirë. Askush nuk i pyet në janë apo nuk janë origjinale… Po kështu nuk kërkon para as puna e disa gjërave të tjera që lidhen me modën, sepse edhe ne me xhepa pak më të cekët dëgjojmë muzikën që na pëlqen dhe gjejmë mënyra për të bërë diçka ndryshe prej të tjerëve. Është në pyetje vetëm dëshira dhe imagjinata jonë”, thotë Jusufi, transmeton Portalb.mk.

E reja A. A. e pranon se përpiqet të jetë ne trend dhe moderne si në veshje ashtu edhe në sjellje, pa u brengosur fort për paragjykimet e rrethit, veçmas ato mashkullore. Ajo është e pavarur prej prindërve dhe mund t’ia lejojë vetes të vishet  e sillet në suazat e të mundshmes. Për Portalb ajo thotë:

“Një mësues imi më ka kritikuar se me mënyrën e veshjes jam duke humbur identitetin dhe vlerat pozitive kombëtare. Kuptohet se nuk mund të pajtohem me këtë gjë, sepse, vaj halli për popullin, vlerat e të cilit duhet të jenë të betonuara me shekuj, pa asnjë lëvizje në hap më kohën”,  transmeton Portalb.mk.

Ndryshe prej të rinjëve mendojnë të rriturit lidhur me punën e modës. Nasar Etemi mendon se dhënia e të rinjëve pas modës që sjell bota në viset tona sjell më shumë dëm se sa dobi. Ai është i bindur se pikërisht imitimi i botës  ka sjellë edhe dukuritë negative si: sjelljet amorale, drogën, krimet…

Sidoqoftë dhe pavarësisht pajtimit ose mospajtimit me depërtimin e modeleve të huaja të jetës ndër ne, koha e ka bërë dhe vazhdon ta bëjë të veten, ndaj të gjithë njerëzit e botës dalëngadalë po u nënshtrohen të njëjtave rregulla të jetës, secili sipas takatit që posedon. Është ky trendi globalizues prej të cilit nuk mund të ikim as ne shqiptarët. /Portalb