Kriza politike, Hahn viziton Kosovën
Komisioneri për Zgjerim i Bashkimit Europian, Johannes Hahn, do të vijë në Kosovë për të biseduar për krizën politike me liderët kosovarë, ka thënë deputeti i Lëvizjes Vetëvendosje, Ilir Deda, në Info Magazine të Klan Kosovës.
Deda këto komente i ka bërë menjëherë pas ardhjes së tij nga vizita në institucionet kryesore të Bashkimit Europian – në Parlamentin, Komisionin dhe Këshillin Europian.
“Ka gatishmëri të komisionerit Johannes Hahn, ku ai ka thënë se do të vijë ne Kosovë dhe do t’i takojë të gjithë liderët politik. Prej momentit që Kosova ka nënshkruar MSA-në ekziston një përgjegjësi e dy anshme në mes Brukselit dhe Prishtinës, kjo është përgjegjësi që e merr BE-ja për ta ndihmuar Kosovën dhe është përgjegjësi që ia kemi dhënë ne me këtë marrëveshje”, ka thënë Deda.
“Zoti Hahn nuk vjen për liberalizim të vizave në Kosovë. Mesazhet kanë qenë që kriza të përfundojë, mesazh tjetër është përmirësim i klimës politike, luftim të korrupsionit dhe është thënë se nëse nuk plotësohen tetë kriteret plotësisht për liberalizmin e vizave ne nuk do të marrim drite jeshile”.
Ai shtoi se kjo ishte “vizita më e vështirë që unë individualisht kam marr pjesë në Bruksel”.
“Kosova më nuk duket një vend serioz në BE. Shihet një zhgënjim i madh te mbështetësve tanë për Kosovën, e sheh sa në shpërpushje është realiteti jonë me atë në Bruksel”.
“Në shekullin 21 problemet e mëdha politike zgjidhen në tryeza politike, ne kemi hy në një finale të kësaj krize politike dhe epilogu do të jenë zgjedhjet e reja parlamentare”.
