Maqedoni, Facebooku – sëmundje apo trend?

Facebook llogaritet rrjeti social më i popullarizuar në botë. Trendi i shtimit të madh të vizitorëve të tij nuk e përjashton as vendin tonë. Më të varurit nga ky rrjet social janë kryesisht të rinjtë, por nuk qëndrojnë pas as fëmijët as më të vjetrit më moshë. Thjesht: për adhuruesit / përdoruesit  e tij, Facebook-u është bërë domosdoshmëri dhe preokupim i përçdoditshëm.

Portalb, anketoi disa përdorues të Facebook-ut, shumica e të cilëve pranojnë se janë bërë të varur në spontanisht e në mënyrë fare të pakuptueshme.

Albin Beqiri thotë se të rinjtë surfojnë me orë të tëra nëpër postimet e pafundme të këtij rrjeti, sepse nuk kanë ndonjë punë a preokupim më të mençur.
“Në Facebook i takojmë të gjithë, shoqërinë, familjarët, profesorët, gjë që nuk na e mundëson jeta reale, prandaj, pse të mos rrimë”, thotë ai.

Facebook më se shumti shfrytëzohet për të komunikuar me miqtë dhe bashkëmendimtarët, për t’u informuar me të rejat e fundit, për të kaluar kohën e lirë etj.

“E shfrytëzoj Facebook-un për të komunikuar dhe për të parë të rejat e fundit edhe pse ndonjëherë harroj se sa orë kanë kaluar që kur kam hyrë aty”, thotë për Portalb, Jehona Ademi.

Ka edhe qytetarë që e shohin me hije dyshimi përdorimin e rrjeteve sociale. Numan Mustafa thotë se këto lloj rrjete të ofrojnë informacione sipërfaqësore mbi gjithçka, se janë si puna e zërave të një enciklopedie që nuk arrijnë të të pajisin me dije bazike…

“Iluzionet se je informuar për gjithçka heq idenë se ka nevojë të lexohen libra, të hulumtohen tema etj. Për çdo gjë që ‘duhet të dihet’, ekziston një faqe Facebook-u që e shpreh ‘shkurtimisht’,  një video në youtube, që na mjafton për t’i treguar botës se sa mirë e njohim temën në fjalë”, thotë për Portalb, Numan Mustafa.

Ai flet edhe për gjërat negative që mendon se sjell Facebook-u: “Negativiteti këtu fshihet në faktin se ‘llajkat’, në nënvetëdijen e të rinjve, përkthehen me afirmim dhe krijojnë një mirazh vetëbesimi, i cili zhduket sapo të përballen me jetën e vërtetë, ku pseudoafirmimi fejsbukian nuk ka kurrfarë vlere”.

Natyrisht se ka edhe nga ata të cilët mendojnë se Facebook-u nuk mund të të bëj të varur nëse di ta kontrollosh veten.

Kështu thotë Besa Lika, e cila edhe pse pranon se është përdoruese e rregullt e Facebookut, mohon të jetë e varur. Për Portalb ajo u shpreh se Facebook-un e sheh si mënyrë praktike dhe shumë të lehtë komunikimi, duke theksuar se ia vlen të përdoret.

Përndryshe, sipas të dhënave të vetë rrjetit social, para disa muajsh u arrit rekordi i përdoruesve të Facebook-ut, sepse, brenda një dite, u shfrytëzua nga 1 miliardë njerëz, ose nga çdo i shtati banor i rruzullit tokësor. Është kjo shifër marramendëse së cilës askush nuk ia sheh fundin. /Portalb