Maqedonasit e Shqipërisë kërkojnë të mësojnë në gjuhën amtare

Shoqëria maqedonase nga Tirana “Ilinden”, bashkë me degën për Gollobërdë, ka parashtruar kërkesë, këtë herë deri te përfaqësuesit më të lartë të pushtetit dhe të gjitha institucionet e Shqipërisë, për organizimin e mësimit në gjuhën maqedonase në nëntëvjeçaren “Dhjetë Heronjtë” të fshatit Trebishtë, zona Gollobërdë, njofton Portalb.

Kërkesën e kanë parashtruar te kryetari i shtetit, Bujar Nishani, kryeministri, Edi Rama, kryetari i Kuvendit, Ilir Meta, ministresha e Arsimit, Lindita Nikola, kryetarja e Komitetit për Minoritete, Konstantina Bezhani, avokati i popullit, Igli Totozani, por edhe deri te komisarja për mbrojtje nga diskriminimi, Irma Baraku.

Në këtë shkollë, por edhe në të gjithë zonën e Gollobërdës, mësimi në gjuhën maqedonase është zhvilluar deri në vitin 1949. /Portalb