Komediani që u zgjodh president në Guatemalë
Protesta nëpër rrugë, skandale të korrupsionit në nivelin më të lartë dhe një ish-president që me zëvendësin e tij janë në burg, në pritje të gjykimit.
Muajt e kaluar në Guatemalë do të mund të krahasoheshin me një telenovelë politike.
Gjërat për të cilat është raportuar kanë qenë, herë pas herë, aq të pabesueshme, saqë mund të qeshje me to, transmeton sot “Koha Ditore” shkrimin e BBC-së.
Prandaj, mbase ish-komedianti Jimmy Morales e ka gjetur punën e përkryer si president i ri i këtij shteti.
Parodia dhe politika
Morales është mësuar të jetë në qendër të vëmendjes. Ai ka qenë pjesë e programit komik të përjavshëm, “Moralejas”, së bashku me vëllanë e vet, Sammyn, për më shumë se 15 vjet.
“Humori m’i ka hapur dyert dhe më ka mundësuar që të përcjell porosi të rëndësishme”, thotë ai, pas fitores në zgjedhje.
Presidenti i posazgjedhur përmend “Diktatorin e Madh”, filmin satirik të Charlie Chaplinit që tallet me Adolf Hitlerin, si inspirim i tij.
“Nuk ka film tjetër me një përmbajtje aq të fuqishme – dhe e tërë kjo është realizuar me humor”, thotë ai.
Megjithatë, jo të gjitha talljet e Moralesit kanë qenë të suksesshme.
