Më shumë se 500 të akuzuar për krime lufte në Bosnjë

Prokuroria shtetërore e Bosnjës ka akuzuar 509 persona për krime lufte gjatë dhjetë viteve të fundit, 235 prej të cilëve ishin të akuzuar gjatë dy viteve e gjysmë të fundit, tha ajo në një deklaratë.

Prokuroria shtetërore e Bosnjës tha se gjatë dekadës së fundit ka akuzuar 509 persona për krime lufte që janë kryer nga viti 1992 deri në vitin 1995.

Aktakuzat kishin lidhje me krime të kryera kundër njerëzve të të gjitha kombësive dhe krimet varionin nga gjenocidi te krimet kundër njerëzimit dhe krimet kundër civilëve dhe të burgosurve të luftës.

Një numër i konsiderueshëm i aktakuzave i referohen rasteve të dhunës seksuale, përdhunimeve dhe abuzimit seksual gjatë luftës.

“Në praktikën tonë të tanishme, janë dhënë dënime në më shumë se 81 për qind të rasteve gjë që flet vetë në lidhje me cilësinë e aktakuzave dhe qëndrimin profesional ndaj punës në këto çështje,” tha prokuroria.

Prokuroria theksoi nevojën për bashkëpunim me vendet e tjera në rajon për të ndjekur penalisht të dyshuarit që fshihen atje.

Duke risjellë në mendje bashkëpunimin me institucionet e saj partnere, ajo tha gjithashtu se të dyshuarit për krime lufte ishin ekstraduar nga Shtetet e Bashkuara, Spanja, Norvegjia dhe vende të tjera.

Në dhjetë vitet e fundit, ndërkohë, gjykata shtetërore e Bosnjës ka burgosur 140 persona me një total prej 1,881 vitesh burg, ndërsa 49 të pandehurit u liruan, që do të thotë se një në katër persona është liruar.

Vendimet e gjykatës shtetërore kanë përdorur fakte të vendosura nga Gjykata Penale Ndërkombëtare për ish-Jugosllavinë, ICTY. Gjykata ka dënuar gjithashtu dhjetë persona të cilët iu transferuan atyre nga gjykata e Hagës.

Rreth 26 marrëveshje fajësie u pranuan nga Departamenti i Krimeve të Luftës, i cili dha dënime me burg me një total prej 229 vitesh.

Në fillim të punës së tij, Departamenti i Krimeve të Luftës zbatoi vetëm Kodin Penal të Bosnjës dhe Hercegovinës, i cili u miratua në vitin 2003.

Në vitet e mëvonshme, dhe sidomos në dy vitet e fundit, ligjet e ish-Jugosllavisë janë zbatuar gjithnjë e më shumë në çështjet e gjenocidit, krime lufte kundër popullsisë civile dhe krime lufte kundër të burgosurve të luftës.

Ndryshimi erdhi pasi Gjykata Europiane për të Drejtat e Njeriut, duke pranuar dy apelime, vendosi se Kodi Penal i ish-Jugosllavisë ka qenë më i butë për autorët e krimeve dhe për këtë arsye preferohej më shumë.

Më pas, Gjykata e Bosnjës dhe Hercegovinës rrëzoi 23 vendime të Gjykatës së Shkallës së Dytë dhe dënimet u rishqyrtuan.

Më shumë se 6,800 dëshmitarë kanë dëshmuar para Departamentit të Krimeve të Luftës, dhe disa prej tyre kanë marrë masa mbrojtëse në përputhje me Ligjin për Mbrojtjen e Dëshmitarëve të Rrezikuar dhe Kërcënuar.