Thikë pas shpine lexuesve, harrohen premtimet profesionale
[Recension: Shqiptarët morrën thikë pas shpine nga Zaevi,premtimet për Monstrën dhe politikanët u harruan!]
Ndarja e lajmit nga komenti mësohet në semestrin e parë në katedrat e gazetarisë, ndërsa teksti që po recensojmë mund të merret shembull në një ligjëratë të tillë. Fatkeqsisht, jo si shembull i mirë. Tekstit i mungojnë elementet e lajmit dhe përmban më tepër elemente komentimi, meqenëse sjellë vetëm bindjet e autorit dhe jo fakte e argumente relevante, aq më pak prononcime.
Linku deri te artikulli origjinal: Shqiptarët morrën thikë pas shpine nga Zaevi,premtimet për Monstrën dhe politikanët u harruan!
Data dhe koha e publikimit: 27.08.2015
Data e recensionit: 04.09.2015
Recensues: Benjamin Arifi
Teksti është përplot komente dhe gjykime, qëndrime të autorit të imponuara si fakte, pa i dëshmuar si të tilla.
Zaev me javë më askund nuk përmend rastin Monstra dhe nuk del në opinion. Ai me këtë po tallet me ndjenjat e shqiptarëve të Maqedonisë. Besimi dhe respekti ndaj Zaevit ka rënë në mënyrë drastike tek qytetarët shqiptarët ku tanimë një pjesë e madhe me rezerva i marrin premtimet e tij se do të publikojë materialet të cilët do të ndriçojnë rastin famëkeq “Monstra”, shkruan Zhurnal.
Është thjeshtë jo-profesionale të konstatosh se një person publik me sjelljen e tij po tallet me një grup etnik. Konstatime të tilla të autorit nuk duhet të zënë vend në një tekst gazetaresk. Lidhur me problematikën për të cilën shkruan, autori nuk e ka kontaktuar palën e akuzuar, në këtë rast kryetarin e LSDM-së Zoran Zaev, për të marrë qëndrimin e tij.
Gjithashtu, është heshtur deklarata e tij e fundit, ku shpjegohet se rasti “Monstra”, që është subjekti qendror i tekstit, do t’i dorëzohet prokurorit special. Kjo deklaratë në masë të madhe demanton pretendimet e autorit në këtë tekst.
Teksti ka edhe lëshime të tjera të rëndësishme. Në disa paragrafe, autori merr të drejtën të flasë në emër të popullit, të përcjellë vlerësimet e popullit pa marrë prononcimin as edhe të një qytetari.
Ky premtim dhe mosrealizim i tij po shkakton një zhgënjim të madh dhe padurim tek popullata shqiptare në Maqedoni. Besimi ndaj Zaevit çdo ditë e më shumë po shënon rënie andaj edhe Zaev e ka tepër rëndë që të kthejë besimin tek shqiptarët të cilët në fillim të publikimit të bombave i dhanë mbështetje të parezervë, madje filloi një grup i konsiderueshëm i shqiptarëve të anëtarësohen në LSDM.
Është jo-serioze dhe jo-profesionale që të flitet në emër të gjithë shqiptarëve, pa u bazuar në prononcime ose ndonjë hulumtim të opinionit publik. Rregullat e gazetarisë janë të qarta, publikohen vetëm fakte dhe jo supozime e konstatime të pabaza.
Teza dhe pyetje është legjitime të ngrihen por ato më pas bazohen në deklarata dhe burime. Kështu, teksti mbetet opinion i autorit, i cili me gjithë të drejtën mund ta kishte vënë në rubrikën “opinion” apo “koment” dhe të gjithë do ta kishin të qartë se nuk bëhet fjalë për lajm.
