Lëvizja BESA: Takim me ambasadoren franceze në Shkup
Sot në selinë e Lëvizjes BESA u realizua një takim miqësor në mes Ambasadores së Francës në Shkup, znj. Laurence Auer, dhe kryetarit të Lëvizjes, Bilall Kasami si dhe Afrim Gashi – anëtarë i Trupit Koordinues.
Në këtë takim, kryesisht u bisedua për situatën aktuale politike në vend, si dhe për mundësitë e zgjidhjes së krizave të njëpasnjëshme në Maqedoni. Në këtë frymë përfaqësuesit e BESËS theksuan qëndrimin e tyre se për Lëvizjen nuk është aspak i mjaftueshëm vetëm ndërrimi i pushtetit, nëse nuk ndryshon edhe sistemi juridiko-kushtetutes i Maqedonisë.
Kështu përfaqësuesit e Lëvizjes BESA konstatuan se atyre u vjen mirë që ditëve të fundit në fakt qëndrimin e artikuluar nga BESA për ridefinimin e shtetit në një formë a tjetër tashmë po e përkrahin edhe subjektet e tjera në vend, si edhe përfaqësues të bashkësisë ndërkombëtare.
Në takim u fol edhe për përcaktimet programore dhe për konceptin e Lëvizjes BESA si dhe për ecurinë, strukturimin dhe aktivitetet e saj. Në një ambient shumë miqësorë, ndër të tjera, Ambasadorja Auer shprehi gatishmëri për takime më të shpeshta dhe bashkëpunim edhe më të thellë mes Lëvizjes BESA dhe shtetit francez.