Çështje të ngritura me të drejtë për Zaevin, por pa përgjigjet e tij
Për çdo çështje, sa do delikate të duket, gazetari duhet të ngrejë pyetje dhe dilema të cilat janë në interes të publikut dhe informimit të drejtë. Por sa herë ngrihen këto çështje, gjithmonë duhet të jenë të përfshira të gjitha palët.
Linku deri te artikulli origjinal: “Ku do ta çojë Zaevi ‘bombën’ për Monstrën?”
Data dhe koha e publikimit: 15.07.2015
Data e recenzionit: 17. 07. 2015
Recenzent: Xhenis Sulimani
Tekstin që po e recensojmë me të drejt ngre çështje që janë në interes të përgjithshëm.
Është një nga çështjet më të rëndësishme fati i njerëzve dhe kur ka dyshime se të pafajshëm mund të jenë akuzuar po dhe dënuar për diçka që se kanë bërë. Teksti me korrektësi ngre dilemat ndaj kreut të opozitës, i cili prej kohësh ka sugjeruar se do të publikojë të ashtuquajturat “bomba” rreth rastit “Monstra”.
“Lideri opozitar maqedonas edhe pse shumë herë iu premtoi qytetarëve se do të publikojë ‘bombën’ dhe të gjitha dokumentet që posedon për rastin “Monstra”, ai këtë nuk e bëri duke taktizuar deri në momentet e fundit.”
Në tekst përsëriten dilemat, në opinion janë ngritur dyshime të mëdha dhe supozohet se rastin “Monstra” e kanë përgatitur shërbimet sekrete me qëllim për të defokusuar vëmendjen e qytetarëve nga problemet reale dhe për të shkaktuar pasiguri tek ata.
Teksti sipas të gjitha standardeve përfundon edhe me atë që në gazetari quhet “background”, pjesa e lajmit që jep informacione shtesë që kanë ndodhur më herët por që plotëson lajmin.
Lajmi do të ishte plotësisht sipas parimeve profesionale nëse do të kishte edhe një reagim të liderit opozitar.
Që teksti të mos japë përshtypjen se është i njëanshëm duhet të përfshijë edhe palën tjetër për të cilën diskutohet në tekst. Qëndrimi i Zoran Zaev për çështjet e ngritura nga gazetari do ta bënte të plotë tekstin. Sipas normave profesionale të gazetarisë një gjë e tillë është e domosdoshme të bëhet gjithmonë, qoftë edhe duke përsëritur qëndrime të thëna më herët.
