Dështon takimi mes MASH-it dhe Plenumit të nxënësve (FOTO)

Asgjë nga takimi mes Ministrisë së Arsimit dhe Plenumit të shkollave të mesme. Kërkesat e nxënësve që të kthehet matura shtetërore dhe të hiqet testimi ekstern, nuk pranohen. Ministria e Arsimit kërkon që të krijohen grupe të punës, për zgjidhjen e problemit, ndërsa heqja e testimit ekstern nuk diskutohet. Nxënësit thonë se nuk janë të kënaqur dhe se bojkoti dhe kampimi para ministrisë do të vazhdojë.

“Nuk kemi rezultat konkret dhe përgjigje konkrete se a do të realizohen të gjitha kërkesat tona. Ne vijmë këtu me shembuj konkret dhe jo për grupe të punës, puna e të cilave do të zgjasë me vite e vite. Ne kërkojmë zgjidhje konkrete të problemit. Bojkoti do të vazhdojë”, tha një përfaqësues i Plenumit.

Nga Ministria e Arsimit njoftuan se ne në mbledhjen e ardhshme të Qeverisë, ministri Ademi do të dorëzojë propozimin për kthimin e konceptit të vjetër të maturës. Ndërkohë bojkoti vazhdon në disa shkolla nëpër qytete të ndryshme, si Shkup, Kumanovë, Tetovë, Ohër, Strumicë dhe Manastir.