Rrëfehet Blendi Fevziu: Ja pse u prish miqësia me Sali Berishën

Në një intervistë për suplementin e së shtunës në “Panorama”, “Panorama Plus”, gazetari Blendi Fevziu rrëfen prapaskenat e emisionit “Opinion”, raportet e tij me politikanët e njohur dhe tregon pse prezenca e tyre në studio është gjithnjë më e rrallë.

Fevziu nuk ngurron të flasë për marrëdhëniet personale që ka me disa prej politikanëve. I pyetur pse kreu i PD-së, Sali Berisha, nuk po shfaqet më në emisionin e tij, ai tha: “Unë kam pasur një raport miqësor me Berishën. Në këto 25 vite gazetari kam krijuar marrëdhënie me pothuajse gjithë njerëzit e rëndësishëm në vend, por Berisha dhe pak të tjerë kanë qenë miq. Ky raport është prishur për arsye të emisionit dhe qëndrimit të tij. Nuk e kam prishur unë, por Berisha dhe, përderisa ai nuk m’i ka bërë asnjëherë arsyet e tij prezente, unë nuk mund të flas për to. Nëse do ta pyesnit dhe do fliste, mund të më shërbente edhe mua për të kuptuar më shumë”.