Ujkani titullar te Palermo dhe kthim te Shqipëria?

Sherr tek Palermo mes drejtuesve dhe Sorrentinos dhe në fund del fitues Samir Ujkani. Pas periudhës së vështirë duket se po vjen dhe momenti i Samir Ujkanit. Presidenti i Palermos, Zamparini, manifestoi synimin e tij për ta promovuar si titullar portierin kosovar, në një kohë kur në kampin sicilian mbetet i pazgjidhur rebusi Sorrentino, nëse do të qëndrojë apo do të largohet.

Është një situatë që krijon konfuzion për një rol specifik si ai i portierit, megjithëse trajneri i skuadrës Iachini deklaroi: “Nuk ka një problem për portën te Palermo. Sorrentino dhe Ujkani janë dy djem që gëzojnë respektin e njëri tjetrit. Zamparini ka thënë se Ujkani është portieri titullar? Ky është një vendim i shoqërisë që nuk i përket stafit teknik. Është një diskutim për vlerësimin e perspektivës së lojtarëve. Sot për sot nisen të dy në barazim. Unë synoj t’i mbaj të dy për të mirën e skuadrës, por siç e dimë merkatoja mund të ndryshojë nga njëra ditë në tjetrën”.

E ndërsa priten lajme nga merkato për të ardhmen e Sorrentinos, e rëndësishme për Ujkanin që u largua nga kombëtarja shqiptare ku ishte parakaluar në hierarkinë e portës nga Etrit Berisha, është se tashmë ka rifituar besimin e klubit, si dhe shanset për të demonstruar vlerat e tij mes shtyllave në sezonin e ri të Serisë A. “Ndërkaq flitet për një rikthim të lojtarit në ekipin përfaqësues kuqezi, ndonëse ende nuk ka asgjë zyrtare. Të shohim se çfarë do të ndodhë. Fakt është se Ujkani e meriton të jetë titullar tek Palermo”, shkruan ‘Sport Ekspres’ në Shqipëri./ Tribuna