Fituesi i një konkursi fotografik refuzoi çmimin pasi veprën e bëri me ndihmën e inteligjencës artificiale

Fituesi i çmimit të madh për fotografi ka refuzuar të pranojë çmimin e tij pasi zbuloi se puna e tij ishte krijuar në të vërtetë nga inteligjenca artificiale. Puna e artistit gjerman Boris Eldagsen, e titulluar “Pseudomania: Elektricisti”, fitoi kategorinë kreative në çmimet Sony World Photography Awards javën e kaluar, raporton The Guardian.

Fotoja fituese bardh e zi tregon dy gra nga breza të ndryshëm.

Në një deklaratë në faqen e tij të internetit, Eldagsen, i cili studioi fotografinë dhe artet pamore në akademi dhe shkolla në Gjermani, Republikën Çeke dhe Indi, tha se ai e futi qëllimisht foton e tij për të testuar konkurrencën, për të ndezur diskutime për të ardhmen e fotografisë dhe të mësojë nëse konkurset e fotografisë janë gati për vepra me IA.

“Nuk janë gati”, shkruan Eldagsen.

Organizatorët e konkursit i thanë BBC-së se Eldagsen i keqinformoi ata për shkallën e inteligjencës artificiale që do të përfshihej në punën e tij, por përpara se të shpallej si fitues ai konfirmoi se fotografia ishte krijuar me ndihmën e IA.

“Kategoria krijuese e konkursit të hapur mirëpret një sërë qasjesh eksperimentale për krijimin e imazheve nga cianotipet dhe rajografitë deri te praktikat e fundit digjitale. Si i tillë, pas korrespondencës sonë me Borisin dhe garancive që ai dha, ne ndjemë se puna e tij plotësonte kriteret për këtë kategori dhe mbështetëm anëtarësimin e tij”, thanë organizatorët e konkursit, duke shtuar se ata presin të eksplorojnë më tej temën dhe të inkurajojnë bisedat rreth përdorimit të IA në fotografi.

Eldagsen shton në njoftimin e tij se nuk do ta pranojë çmimin dhe sugjeroi që ai t’i dhurohet një festivali fotografik të organizuar në Odessa të Ukrainës.

“Imazhet dhe fotot e inteligjencës artificiale nuk duhet të konkurrojnë me njëra-tjetrën për një çmim si ky. Këto janë entitete të ndryshme. IA nuk është fotografi. Prandaj nuk do ta pranoj çmimin”, shkruan artisti gjermane.

Truku i Eldagsen vjen në një kohë debati intensiv rreth përdorimit dhe implikimeve të inteligjencës artificiale, madje edhe me parashikimet apokaliptike se teknologjia është në prag të dëmtimit të pakthyeshëm të përvojës njerëzore. Përdorimi i IA në çdo fushë – nga shkrimi i poezive dhe eseve, tek makinat pa shofer, terapistë chatbot dhe zhvillimi i mjekësisë – është debatuar gjerësisht muajt e fundit.

Ndryshe, të gjithë fituesit e konkursit të organizuar nga Organizata Botërore e Fotografisë mund të shihen në këtë postim të BBC-së.