Kryeministri i ri i Zelandës së Re do të jetë Chris Hipkins
Partia Laburiste në pushtet e Zelandës së Re njoftoi sot se Chris Hipkins do të jetë lideri i ri i partisë dhe kryeministri i 41-të i vendit, transmeton Anadolu Agency (AA).
Zgjedhja e tij u konfirmua nga një votim në një takim të grupit parlamentar të partisë, i cili zgjati më pak se një orë.
Anëtari 44-vjeçar i grupit parlamentar dhe ministri i Arsimit ishte i vetmi kandidat për këtë post, pas dorëheqjes së papritur të paraardhëses së tij, Jacinda Ardern.
Ardern njoftoi të enjten se ajo do të largohet nga posti i kryeministres dhe udhëheqësja e partisë në shkurt dhe nuk do të kandidojë për të njëjtin pozicion në zgjedhjet e përgjithshme të 14 tetorit 2023.
Është njoftuar se Hipkins do të betohet si kryeministër të mërkurën.
Pas zgjedhjeve, ai tha se rikonstruimi i kabinetit do të shpallet javën e ardhshme.
Përveç fokusimit në çështjet e brendshme, Hipkins tha se qeveria e tij do t’i jepte prioritet inflacionit në rritje, çmimeve të larta të banesave, ligjit dhe rendit.
