Mijëra vetë i dhanë lamtumirën e fundit Gorbaçovit, mungon Putini
Ish-udhëheqësi sovjetik Mikhail Gorbaçov sot u varros në Moskë, pas një ceremonie që bëri bashkë me mijëra vetë që i dhanë atij lamtumirën e fundit. Presidenti rus Putin i shpërfilli homazhet e zhvilluara sot për nder të Gorbaçov, transmeton VOA.
Kremlini gjithashtu refuzoi të zhvillojë një funeral shtetëror për të, çka pasqyron shqetësimin mbi trashëgiminë e njeriut që njihet për reformat drastike të ndërmara në vend, të cilat ndihmuan në përfundimin e Luftës së Ftohtë.
Gorbaçov është nderuar në mbarë botën për rrëzimin e Perdes së Hekurt, por ai është ndeshur me mjaft kritika në Rusi, lidhur me rënien e ish-Bashkimit Sovjetik dhe problemet e mëdha ekonomike që zhytën me miliona rusë në varfëri.
Të enjten, Putin vendosi privatisht lule në arkivolin e Mikhail Gorbaçovit në një spital të Moskës.
Mikhail Gorbaçov vdiq të martën në moshën 91-vjeçare. Trupi i tij u vendos në varrezat Novodevichy të Moskës pranë varrit të bashkëshortes së tij, Raisa Gorbaçov.
