Polonia dëboi 45 diplomatë rusë të dyshuar për spiunazh
Polonia ka dëbuar 45 diplomatë rusë të dyshuar për spiunazh, transmeton Anadolu Agency (AA).
Siç tha ministri i Brendshëm i Polonisë, Mariusz Kaminski në Varshavë, “45 spiunë që pretendonin se ishin diplomatë” u dëbuan.
“Me vendosmëri dhe tërësisht do të çmontojmë rrjetin e shërbimeve speciale ruse në vendin tonë”, shkroi ministri në Twitter.
Ambasadori rus në Poloni, Sergei Andrejev konfirmoi dëbimin e diplomatëve në një konferencë për media kur mbërriti nga Ministria e Punëve të Jashtme në Varshavë, duke shpjeguar se ata duhet të largohen nga Polonia më së voni brenda 5 ditëve.
Ai shtoi se akuzat se diplomatët në Poloni po kryenin aktivitete që nuk ishin në përputhje me statusin e tyre diplomatik janë të pabaza dhe njoftoi se Moska do të marrë kundërmasa.
Ambasadori rus shtoi se Polonia dhe Rusia mbajnë marrëdhënie diplomatike.
“Ambasadat qëndrojnë, ambasadorët qëndrojnë”, tha Andrejev.
Shërbimi i kundërzbulimit të Polonisë, ABW, tha gjithashtu se ka arrestuar një shtetas polak të dyshuar për spiunazh për shërbimet sekrete ruse.
Siç shpjeguan, veprimet e tij rrezikuan sigurinë e brendshme dhe të jashtme të Polonisë.