Erdogan në Kiev: Turqia e gatshme ta bëjë pjesën e saj për t’i dhënë fund tensioneve Rusi-Ukrainë
Turqia është e gatshme të bëjë pjesën e saj për t’i dhënë fund tensioneve midis Ukrainës dhe Rusisë, tha presidenti turk Recep Tayyip Erdogan, raporton Anadolu Agency (AA).
Deklaratat e presidentit Erdogan erdhën në një konferencë të përbashkët shtypi me homologun e tij ukrainas Volodymyr Zelensky në kryeqytetin e Ukrainës, Kiev.
Përpara konferencës, dy liderët diskutuan për mbi tre orë zhvillimet në rajon dhe marrëdhëniet dypalëshe.
“Unë kam theksuar se Turqia do të ishte e lumtur të mirëpriste një samit (mes Rusisë dhe Ukrainës) në nivel liderësh, ose diskutime në nivel teknik”, tha Erdogan.
“Dua të ritheksoj se ne vazhdojmë të mbështesim integritetin territorial dhe sovranitetin e Ukrainës, duke përfshirë Krimenë”, tha ai, duke shtuar se Ankaraja i kushton rëndësi rolit të Misionit Special të Monitorimit të OSBE-së në Ukrainë në konfliktin e Donbasit.
Në sferën e ekonomisë, Erdogan tha se ata shkëmbyen mendime mbi hapat për të rritur vëllimin e tregtisë në 10 miliardë dollarë dhe se marrëveshja e saponënshkruar e tregtisë së lirë do të ketë ndikim pozitiv në këtë drejtim.
Takimi i dy liderëve përkoi me 30-vjetorin e vendosjes së marrëdhënieve diplomatike midis Turqisë dhe Ukrainës. Pas takimit kokë më kokë, u mbajt edhe mbledhja e 10-të e Këshillit Strategjik të Nivelit të Lartë me pjesëmarrjen e delegacioneve shoqëruese.
Palët turke dhe ukrainase kanë nënshkruar gjithsej tetë marrëveshje bashkëpunimi dhe memorandume mirëkuptimi.
Marrëveshja e tregtisë së lirë u nënshkrua nga ministri turk i Tregtisë Mehmet Muş dhe kryeministri ukrainas Denys Shmyhal. Vitin e kaluar, vëllimi i tregtisë dypalëshe midis dy vendeve u rrit me 59 për qind, për të arritur në 7,4 miliardë dollarë.
Nga ana tjetër, Zelensky tha se nënshkrimi i marrëveshjes së tregtisë së lirë është një “moment historik” dhe falënderoi gjithashtu homologun Erdogan për ofertën e tij për të vepruar si ndërmjetës në përfundimin e tensioneve midis Moskës dhe Kievit.
Ai shtoi se marrëveshjet e reja të nënshkruara për mbrojtjen do të zgjerojnë prodhimin e dronëve nga firma turke e mbrojtjes Baykar në Ukrainë.
Droni turk Bayraktar TB2 është shitur në vende si Ukraina, Katari, Azerbajxhani dhe Polonia. Në maj të vitit të kaluar, Polonia u bë shteti i parë anëtar i BE-së dhe NATO-s që bleu dronë nga Turqia.
Forcat e Armatosura të Ukrainës blenë për herë të parë dronin Bayraktar TB2 dhe stacionet e kontrollit tokësor nga Turqia në vitin 2019.
Ukraina dhe Rusia janë përfshirë në konflikt që nga shpërthimi i armiqësive në rajonin lindor të Donbasit në vitin 2014 pasi Rusia aneksoi ilegalisht Gadishullin e Krimesë.
Rusia gjithashtu ka grumbulluar kohët e fundit dhjetëra mijëra trupa pranë kufijve të Ukrainës, duke shkaktuar frikën se Kremlini mund të planifikojë një tjetër ofensivë ushtarake kundër ish-republikës sovjetike.
Moska ka mohuar se po përgatitet për invazion, duke thënë se trupat e saj janë atje për stërvitje.
