Maqedonia e Veriut dhe Shqipëria të fillojnë bisedimet për anëtarësim pa vonesë, bëjnë thirrje së bashku SHBA-ja dhe BE-ja
Shtetet e Bashkuara dhe Bashkimi Evropian do të forcojnë më tej angazhimin e tyre për Ballkanin Perëndimor, në mbështetje të përparimit të rajonit drejt integrimit evropian, thuhet në një deklaratë të përbashkët të Uashingtonit dhe Brukselit, që pason takimin e Sekretarit amerikan të Shtetit Antony Blinken me Përfaqësuesin e Lartë të BE për Politikën e Jashtme Josep Borrell.
Ballkani Perëndimor, thekson deklarata, i përket Bashkimit Evropian dhe bën thirrje që bisedimet e antarësimit me Shqipërinë dhe Maqedoninë e Veriut të fillojnë pa vonesë.
Uashingtoni dhe Bruksli shprehin mbështetje të fortë për procesin e zgjerimit. Anëtarësimi në BE, një përparësi e të gjitha vendeve të Ballkanit Perëndimor, thuhet më tej në deklaratë, do t’i ndihmojë këto vende të konsolidojnë institucionet demokratike, të mbrojnë të drejtat themelore dhe të zbatojnë shtetin ligjor.
Shtetet e Bashkuara dhe Bashkimi Evropian, thuhet në deklaratë, mbështesin dialogun e ndërmjetësuar nga Brukseli si mekanizmin kryesor për të arritur një zgjidhje për normalizimin e përgjithshëm të marrëdhënieve mes Serbisë dhe Kosovës. Uashingtoni dhe Brukseli u bëjnë thirrje Serbisë dhe Kosovës të shmangin tensionet, si ato që u vunë re kohët e fundit në veri të Kosovës, që rrezikojnë stabilitetin. Deklarata shpreh mbështetje për angazhimin e Kosovës për të luftuar korrupsionin dhe krimin e organizuar, si dhe dënon si të papranueshme dhunën ndaj civilëve, gazetarëve, policisë ose autoriteteve.
Shtetet e Bashkuara dhe Bashkimi Evropan shprehin mbështetje të fortë për integritetin territorial të Bosnje Hercegovinës, për përpjekjet për reforma elektorale dhe kushtetore, si dhe për ruajtjen e funksionalitetit të institucioneve shtetërore në këtë vend.
Deklarata i bën thirrje forcave politike në Mal të Zi të bashkëpunojnë për të ruajtur orientimin strategjik të vendit duke pasqyruar dëshirat e popullit për të realizuar reformat e duhura, që shpresat për anëtarësim në BE të bëhen realitet.
Raportin e plotë të KE-së për Maqedoninë e Veriut mund ta gjeni: KËTU
- LEXO: Borrel-Blinken: Shqipëria dhe Maqedonia e Veriut t’i fillojnë bisedimet pa zvarritje
- LEXO: Dorëzimi i Raportit të progresit, ambasadori Gir: Sistemi gjyqësor në RMV nuk është i përgatitur sa duhet
- LEXO: KE e miratoi raportin për Maqedoninë e Veriut: Vendi vazhdon t’i plotësojë kushtet për fillimin e bisedimeve
- LEXO: Pjesë nga Raporti i KE-së: Shtyrja e negociatave ndikon negativisht në besueshmërinë e RMV-së dhe BE-së
- LEXO: Kushtet e burgjeve në Maqedoninë e Veriut – therë në sy në rrugën drejt BE-së
- LEXO: Radev: Respektimi i të drejtave të bullgarëve në Maqedoninë e Veriut është paradhoma për anëtarësim në BE
- LEXO: Osmani: Nuk mund të kemi marrëveshje me Bullgarinë nëse në të nuk përfshihet data për konferencën e parë ndërqeveritare