SHBA, u arrestua një person i armatosur përreth ndërtesës së Kongresit

Në SHBA derisa janë marrë masa intensive të sigurisë përpara ceremonisë së betimit të Joe Biden që do zhvillohet më 20 janar, një person i dyshuar është arrestuar nga policia me kartë akreditimi false dhe me armë të mbushur përreth ndërtesës së Kongresit, transmeton Anadolu Agency (AA).

Pas bastisjes së Kongresit më 6 janar në SHBA, tërheqin vëmendjen masat e jashtëzakonshme të sigurisë në kryeqytetin Washington.

Sipas lajmit të CNN, policia e Kongresit ka arrestuar një të dyshuar në mbrëmjen e së premtes në pikën e kontrollit të sigurisë përreth ndërtesës së Kongresit.

Gjatë kontrollit në automjetin e personit i cili u kuptua se karta e akreditimit që kishte paraqitur gjatë kontrollit ishte false u gjet një pistoletë e mbushur e tipit Glock dhe 509 plumba.

Mësohet se personi në fjalë u arrestua për disa krime, përfshirë mbajtjen pa leje të armëve dhe municioneve.

– Masat e sigurisë në nivelin më të lartë

Në anën tjetër krahas mbi 20 mijë forcave të Gardës Kombëtare edhe një numër i madh të policëve në Washington kanë marrë masa të larta sigurie duke formuar barrikada të policisë dhe pika kontrolli në hyrjet dhe daljet në Washington.

Në kryeqytetin ku lejohet hyrja e vetëm atyre personave që kanë akreditime dhe i automjeteve pas një kontrolli të detajuar, bëhet e ditur se shumë bulevarde dhe rrugë do të jenë të mbyllura për trafikun dhe këmbësorët deri ditën e enjte.

Ndërkohë mijëra dyqane dhe magazina në Washington kanë mbyllur me dërrasa pjesët e jashtme në mënyrë që të mos dëmtohen nga ngjarje të mundshme.

Në bastisjen që ndodhi në Kongresin Amerikan më 6 janar, humbën jetën 5 persona, përfshirë 1 polic si dhe dhjetëra të tjerë u plagosën.

Në një votim në Dhomën e Përfaqësuesve, u miratua neni i shkarkimit kundrejt presidentit amerikan Donald Trump të cilin demokratët e akuzojnë për “nxitje të rebelimit”. Në një votim që do të mbahet në Senat, do të vendoset nëse Trump është apo jo fajtor për ngjarjet në Kongres.