Berisha: Do të rikthejmë të gjithë personat që abuzojnë me vizat
I pranishëm në zhvillimin e ministrialit, që u zhvillua Tiranë, ka qenë edhe kryeministri i vendit, Sali Berisha.
Gjatë fjalës së tij kreu i qeverisë, lidhur me kërkesat e larta për azil, deklaroi se nuk do të toleroj asnjë shtetas të abuzon me regjimin e vizave, çka do t’i privonte lëvizjen e lirë qytetarëve të tjerë shqiptarë, dhe kjo për një grup të caktuar azilkërkuesish.
Në këtë kontekst ai shtroi domosdoshmërinë e ndërmarrjes së një fushate informacioni për të ndërgjegjësuar qytetarët lidhur me domosdoshmërinë e respektimit të rregullave dhe afateve kohore të qëndrimit në vende të zonës Shengen.
“I përcjell KE nëpërmjet komisioneres Malstrom dhe presidentes qipriote vendosmërinë tonë për të marrë çdo hap dhe për t’i dhënë përgjigjen e vendosur fenomenit të azilkërkuesve. Jemi të gatshëm të firmosim çdo marrëveshje për rikthimin në vend të personave që abuzojnë me këtë vendim shumë të rëndësishëm dhe fisnik. Mbi bazën e këtij qëndrimi ne kemi riatdhesuar nga Belgjika, dy herë, grupe që kishin aplikuar në mënyrë të pamerituar, po përgatitemi ta bëjmë këtë me Luksemburgun dhe jemi të gatshëm ta bëjmë me secilin vend të Shengenit”- u shpreh kreu i qeverisë Berisha, në fjalën e tij në ministerialin BE-Ballkan në Tiranë .
Nga ana tjetër komisionerja për drejtësi dhe çështje të brendshme e BE-së, Cecilia Malmstrom kërkoi përforcim të agjencive të ligjit, si dhe një luftë të ashpër kundër korrupsionit dhe krimit të organizuar në këto shtete. Lidhur me vendin tonë, ajo vlerësoi progresin e bërë në drejtim të reformave, duke vlerësuar në mënyrë të veçantë heqjen e imunitetit për zyrtarët e lartë.
“Vijimësia e angazhimit është me rëndësi në luftën kundër krimit të organizuar duke përfshirë edhe hetimet financiare. Përpjekje duhet tek sekuestrimi i aseteve kriminale. Korrupsioni është mjaft i përhapur dhe lejon infiltrimin e grupeve kriminale në sektorin publik. Duhet të ketë dënime në luftën kundër krimit të organizuar dhe korrupsionit. BE do japë ndihme”,- theksoi Malstrom në Ministerialin me Ministrat e Brendshëm dhe të Drejtësisë së Shqipërisë, Maqedonisë, Serbisë, Bosnjës e të Malit të Zi, që nisi sot në Tiranë.
Problemi i azilkërkuesve të rremë dhe çështja e vizave në zonën Shengen do të jetë në qendër të takimit dyditor të ministrave për drejtësi dhe çështje të brendshme në mes të Bashkimit Evropian dhe Ballkanit Perëndimor.
Ministrat e Brendshëm të Suedisë, Gjermanisë, Holandës, Belgjikës, Luksemburgut dhe Francës kanë kërkuar më 25 tetor nga Parlamenti Evropian që urgjentisht të votojë klauzolën për pezullimin e përkohshëm të regjimit pa viza për Ballkanin, për shkak të numrit të madh të azilkërkuesve të rremë nga ky rajon.
Raportuesja e Parlamentit Evropian për liberalizimin e vizave, Tanja Fajon, ka thënë se mekanizimi për pezullimin e regjimit liberal mund të hyjë në fuqi në fund të këtij viti ose në fillim të vitit të ardhshëm.
Sipas saj, shqetësimet më të mëdha për azilkërkues i paraqesin Serbia dhe Maqedonia, ndërkohë që më pak shqetësuese është situata në Shqipëri, Bosnjë dhe Mal të Zi./portalb/
