Rusia e gatshme të shkëmbejë të burgosurit me Ukrainën
Rusia ka thënë se është e interesuar për një shkëmbim të plotë të të burgosurve me Ukrainën, njofton REL.
Zëdhënësi i Kremlinit, Dmitry Peskov, u tha gazetarëve në Moskë më 4 tetor se “angazhime të caktuara janë duke u bërë në atë drejtim”.
“Gjithçka varet nga gatishmëria e të dyja palëve”, tha Peskov.
Deklarata e tij vjen një ditë pasi ministri i Jashtëm i Ukrainës, Vadym Prystayko, tha se “një shkëmbim i gjerë i të burgosurve” do të kryhet javën e ardhshme.
Më 7 shtator, Rusia dhe Ukraina shkëmbyen gjithsej 70 të burgosur. Vendet perëndimore e përshëndetën veprimin duke e konsideruar atë si një mundësi për të përmirësuar marrëdhëniet e tensionuara midis Ukrainës dhe Rusisë.
Ky ishte shkëmbimi i parë i madh i të burgosurve, midis dy vendeve, që nga viti 2017.
Raportet mes dyja vendeve janë tensionuar që kur Rusia aneksoi rajonin e Krimesë në muajin mars të vitit 2014 dhe filloi të mbështesë separatistët pro-rus në lindje të Ukrainës. Konflikti po vazhdon dhe deri më tani më shumë se 13,000 njerëz janë vrarë.
