Irani planifikon largimin e katër zerove nga valuta
Qeveria iraniane ka miratuar një plan për të larguar katër zero nga valuta kombëtare, rial, teksa shteti tenton të përballet me inflacion të lartë.
Kjo masë është bërë e ditur nga zëdhënësi qeveritar, Ali Rabiei, pas mbledhjes së kabinetit më 31 korrik.
Këtij plani i duhet mbështetje prej parlamentit dhe Këshillit të Guardianëve, transmeton REL.
Rivlerësimi i valutës iraniane është diskutuar për një kohë të gjatë, meqë vlera e saj ka rënë sidomos pasi Shtetet e Bashkuara janë tërhequr nga marrëveshja bërthamore e vitit 2015, që Teherani ka nënshkruar me fuqitë botërore.
Përveç kësaj, Uashingtoni ka rikthyer të gjitha sanksionet ndaj Iranit duke i goditur rëndë ekonominë dhe sektorin e naftës.
Vlera e valutës iraniane ka rënë nga 32,000 sa ka qenë për 1 dollarë në kohën e marrëveshjes bërthamore, në 120,000 rial për 1 dollarë.
Në muajin prill, Fondi Monetar Ndërkombëtar ka thënë se pret që ekonomia e Iranit të bie për 6 për qind këtë vit dhe se inflacioni mund të arrijë 40 për qind teksa ky shtet përballet me sanksione amerikane.
