Sulmet në Sri Lankë, ulet numri i viktimave në 253
Autoritetet e Sri Lankës kanë përditësuar në 253 numrin e viktimave nga sulmet terroriste ndaj tetë pikave në ditën e Pashkëve, pasi më herët njoftuan për 359 të vdekur, transmeton Anadolu Agency (AA).
Ministria e Shëndetësisë tha se është bërë gabim në përllogaritjen e viktimave dhe se bilanci aktual është 253.
Autoritetet kanë njoftuar se personi i dyshuar si organizator i sulmeve ka humbur jetën gjatë sulmit në hotelin Shangri-La në Colombo.
Sulmet dyshohet të jenë kryer nga 9 persona.
Policia vazhdon të ndërmarrë aksione policore ndërsa tashmë ka pubikuar fotografitë e 7 personave të kërkuar në lidhje me sulmet.
Të dielën në orët e para të mëngjesit në Sri Lankë u kryen sulme ndaj një kishe në Batticaloa, ndaj kishave St. Anthony’s në Kochchikade dhe St.Sebastian në Katana, si dhe ndaj hoteleve me pesë yje Shangri-La, Cinnamon Grand dhe Kingsbury në kryeqytetin Colombo.
Pas këtyre sulmeve, shpërthime ndodhën edhe në Dehiwala në periferi të Colombos dhe në afërsi të një mbikalimi në Dematogoda.