OKB: Koreja e Veriut ka nevojë për 111 milionë dollarë ndihmë humanitare
Organizata e Kombeve të Bashkuara (OKB) njofton se Koresë së Veriut, ndaj të cilës po zbatohen sanksionet ndërkombëtare, vitin e ardhshëm do t’i nevojiten të paktën 111 milionë dollarë ndihmë humanitare, transmeton Anadolu Agency (AA).
Sipas agjencisë së lajmeve Yonhap, në dokumentin e publikuar nga Zyra për Koordinimin e Çështjeve Humanitare të OKB-së me titull “Vështrim të Përgjithshëm Global Humanitar 2019”, thuhet se ndihma për Korenë e Veriut e cila vitin e ardhshëm synohet të dërgohet për 6 milionë njerëz, pritet të kushtojë të paktën 111 milionë dollarë.
Në dokument thuhet se parashikohet që numri i njerëzve që kishin nevojë për ndihma humanitare gjatë vitit 2018 ishte 10,3 milionë, ndërsa sanksionet po ndikojnë ndaj operacioneve humanitare.
Më tej theksohet se siguria ushqimore në Korenë e Veriut gjatë vitit 2018 është përkeqësuar për shkak të përmbytjeve dhe valës së temperaturave të larta.
