USHT, studentët do të mund ta përdorin Spitalin Klinik të Tetovës
Vitin akademik 2011/2012, Universiteti Shtetëror i Tetovës e përmbylli me nënshkrimin e Marrëveshjes për bashkëpunim të ndërsjellë me IPSH, Spitalin Klinik të Tetovës.
Marrëveshja parashikon këmbim të ndërsjellë të përvojave dhe njohurive profesionale në lëmin e shkencave të mjekësisë, përvojave dhe aftësive të kuadrit mjekësor të IPSH-Spitalit Klinik të Tetovës dhe kuadrit mësimdhënës profesional të Fakultetit të Shkencave të Mjekësisë të Universitetit Shtetëror të Tetovës.
Kjo marrëveshje u nënshkrua nga Rektori i USHT-së, Doc.dr Vullnet Ameti dhe Drejtori i Spitalit Klinik të Tetovës, Dr.spc. Florin Besimi.
USHT dhe Spitali klinik së bashku do të organizojnë këshille të përbashkëta profesionale si dhe seminare. Studentët e Fakultetit të Shkencave të Mjekësisë të Universitetit Shtetëror të Tetovës do të mund ti shfrytëzojnë përvojat profesionale, aftësitë dhe njohuritë e kuadrit mjekësor të IPSH – Spitalit Klinik të Tetovës.
Marrëveshja nënkupton shfrytëzimin e hapësirave dhe potencialit kadrovik të IPSH-Spitalit Klinik Tetovë për nevojat e Fakultetit të Shkencave të Mjekësisë të Universitetit Shtetëror të Tetovës, në pajtueshmëri me Ligjin për mbrojtje shëndetësore.
“Marrëveshja që nënshkruam sot është mjaft e rëndësishme për dy institucionet tona, sepse ka për qëllim kujdesin shëndetësor dhe aftësimin e studentëve tanë për të ardhmen e tyre profesionale në fusha të ndryshme të mjekësisë” tha Rektori i USHT-së, Vullnet Ameti./Portalb/