Siri, 887 civilë të vrarë vetëm në muajin korrik
Rrjeti Sirian i të Drejtave të Njeriut (SNHR) njoftoi se 887 civilë janë vrarë në Siri gjatë muajit korrik, shumica e të cilëve nga ana e regjimit të Bashar al-Asadit, transmeton Anadolu Agency (AA).
Këto të dhëna SNHR i shpalosi në një raport të publikuar në lidhje me civilët e vrarë në Siri për muajin korrik.
Sipas raportit, nga regjimi i Asadit muajin e kaluar jetën kanë humbur 684 civilë, gjashtë kanë pësuar nga sulmet e forcave ruse që ofrojnë mbështetje ajrore për regjimin sirian, kurse 11 civilë janë vrarë nga organizata terroriste YPG/PKK.
Ndërkaq, 85 civilë janë vrarë nga organizata terroriste DEASH, ndërsa dhjetë kanë humbur jetën në sulmet e forcave të koalicionit ndërkombëtar kundër DEASH-it, thuhet në raport.
Rrjeti sirian po ashtu tha se nëntë civilë janë vrarë nga opozita ushtarake muajin e kaluar, dy nga grupi i armatosur kundër regjimit Hayat Tahrir al-Sham dhe 79 civilë nga persona të paidentifikuar.
– 547 të vdekur nga torturat
SNHR njoftoi se 547 civilë, përfshirë gra dhe fëmijë, kanë humbur jetën si pasojë e torturave.
Në raport theksohet se gjithsej 693 civilë janë vrarë përmes torturave që nga fillimi i vitit 2018, prej të cilave 675 janë kryer nga regjimi i Asadit.
SNHR po ashtu tërhoqi vëmendjen se 13.692 civilë janë torturuar për vdekje nga fillimi i krizës siriane në mars të vitit 2011 e deri në gusht të vitit 2018.
Në raport është bërë thirrje për mbrojtjen e civilëve në Siri dhe vendosjen e përgjegjësve para drejtësisë.
