Kosovë, arrestohen 5 persona për prostitucion
Drejtoria për Hetimin e Trafikimit me Qenie Njerëzore e Policisë së Kosovës, pas hetimeve paraprake ka realizuar dy operacione, me qellim arrestimin e personave të përfshirë në veprimtari penale, njofton Kallxo.com. Sipas një njoftimi të Policisë, në fshatin Vitomiricë të Pejës është zhvilluar operacioni policor nën dyshimin e konsumimit të veprave penale: Mundësim ose detyrim në prostitucion dhe ofrim i lokaleve për prostitucion.
Në një lokal që shfrytëzohej për masazh, dyshohet se shfrytëzohej edhe për veprimtari të kundërligjshme. Nga aty janë arrestuar katër të dyshuar: A.G. i gjinisë mashkullore (viti i lindjes 1991), A.G. (1984), i gjinisë mashkullore, V.T. (1992), i gjinisë femërore dhe F.D. (2001), i gjinisë femërore.
Dy të dyshuarit e parë me vendim të prokurorit kompetent janë dërguar në mbajtje për 48 orë.
Nga vendi i ngjarjes janë marrë dëshmi relevante rreth kryerjes së kësaj veprimtarie të kundërligjshme.
Me vendim të zyrtarëve kompetentë, lokali ku zhvillohej veprimtaria e kundërligjshme është mbyllur.
Në operacionin tjetër të zhvilluar në fshatin Hajvali të Prishtinës, në bashkëpunim edhe me inspektor të ATK-së dhe zyrtarë kompetentë komunalë, në një lokal që shfrytëzohej për masazh është arrestuar i dyshuari: F.Rr. (1990), i gjinisë mashkullore.
Për të njëjtin ekziston dyshimi i bazuar se ka trafikuar dy viktimat e gjinisë femërore me qëllim të shfrytëzimit për punë të detyruar dhe shërbime seksuale.
Me urdhër të prokurorit i dyshuari dërgohet në mbajtje për 48 orë.
Dy viktimave u është ofruar strehim dhe trajtim sipas procedurave standarde për viktimat e trafikimit.
Nga vendi i ngjarjes janë marrë dëshmi relevante rreth kryerjes së kësaj veprimtarie të kundërligjshme.