Marrëdhëniet Britani-Rusi, Boris Johnson vizitë në Moskë
Sekretari i Jashtëm britanik Boris Johnson do të vizitojë Moskën në javët e ardhshme, ku do të zhvillojë bisedime me homologun e tij rus, njofton Top Channel.
Lajmin e ka bërë të ditur qeveria britanike këtë të shtunë.
Kryeministrja Theresa May dhe Johnson e kanë bërë të qartë se politika e Mbretërisë së Bashkuar kundrejt Rusisë do të jetë “aktive por e kujdesshme” dhe se vizita do të zhvillohet duke u bazuar tërësisht në këtë qasje.
Shefi i diplomacisë britanike ka pranuar kështu një ftesë nga ministri i Jashtëm rus, Sergey Lavrov për të vizituar Moskën në javët e ardhshme. Kjo do të jetë vizita e parë e një sekretari të Jashtëm britanik në 5 vitet e fundit.
“Diskutimet do të fokusohen në marrëdhëniet Britani-Rusi dhe çështjet aktuale ndërkombëtare, përfshirë Sirinë dhe Ukrainën, për të cilat kemi qëndrime të ndryshme”, ka deklaruar një zëdhënëse e Foreign Office.
Ajo ka saktësuar se, nuk bëhet fjalë për një rifillim bashkëpunimi mes dy vendeve dhe se Johnson do t’u mëshojë qëndrimeve të Londrës zyrtare.
Detajet sa i takojnë datës dhe kohëzgjatjes së vizitës pritet të caktohen në ditët në vazhdim.