Rusia vendos sistem raketor në Siri; SHBA reagon
Ministria e Mbrojtjes e Rusisë tha se ka vendosur një sistem antiraketor S-300 në bazën e saj detare në Tartus të Sirisë, transmeton REL.
Në deklaratën e lëshuar të martën, ministria tha se sistemi ka për qëllim “të garantojë sigurinë e bazës” nga ajri.
Sistemi S-300 është i projektuar për të goditur aeroplanë dhe raketa balistike.
“Më lejoni t’ju kujtoj se S-300 është sistem krejtësisht mbrojtës dhe nuk paraqet kërcënim për askënd”, tha zëdhënësi i Ministrisë ruse të Mbrojtjes, Igor Konashenkov.
Në Uashington, zëdhënësat e Shtëpisë së Bardhë dhe të Departamentit të Mbrojtjes kanë kritikuar vendosjen, duke thënë se qëllimi i deklaruar i ushtrisë ruse në Siri është lufta kundër grupeve terroriste dhe se asnjë grup terrorist që operon atje nuk ka kapacitete për sulme ajrore.
Tensionet midis Rusisë dhe Perëndimit janë të larta.
Të hënën, Shtetet e Bashkuara kanë ndërprerë bisedimet me Rusinë për koordinimin e sulmeve ajrore kundër grupeve xhihadiste.
Armëpushimi në Siri, i ndërmjetësuar nga Uashingtoni dhe Moska, ka kolapsuar muajin e kaluar.
