Ja cilët të akuzuar nga “Grupi i Kumanovës” u keqtrajtuan nga Njësiti special i policisë
Avokati i palës mbrojtëse Naser Raufi ka zbuluar emrat e të akuzuarve për ngjarjet e Kumanovës, të cilët janë keqtrajtuar nga njësiti special derisa po i sillnin nga burgjet në Gjykatën Supreme, raporton Portalb.
Avokati Raufi për torturën që po u ushtrohet disave nga të akuzuarit dhe gishtin e ka drejtuar ka institucionet përkatëse.
“U ankuan tre të akuzuar: Sevdail Miftari, Lirim Krasniqi dhe Hajrush Avdijaj. Janë të keqtrajtuar nga njësia speciale. Mendoj se as Avokati i Popullit as Prokuroria nuk e kryejnë punën e duhur. Në kontinuitet vazhdon malltretimi. Unë do ngre edhe një padi penale, për këtë rastin e fundit. Drejtori i burgut, gardianët, të gjithë e kanë përgjegjësinë, posacërisht Ministria e Drejtësisë. Do të kërkojmë përgjegjësi dhe do të ngrejë padi penale edhe për MPB-në”, tha avokati Raufi.
Me të nisur seanca gjyqësore për “Grupin e Kumanovës”, njëri prej të akuzuarve Sevdail Miftari tha se njësiti special e ka keqtrajtuar gjatë rrugës.
“Po na malltretojnë, derisa po na sjellin në Shkup. Na shkelin me këmbë”, tha Miftari në seancën e sotme gjyqësore.
Për shkak të bashkimit të dy lëndëve gjykatësja sipas procedurës ligjore, në seancën e sotme ka lexuar deklaratat e mëparshme të dëshmitarëve.
Seanca e ardhshme vazhdon më 16 qershor./Portalb
